uMthunywa
YiNtatheli kaMthunywa
KULENTOMBAZANA eleminyaka elitshumi lantathu yeLupane okubikwa izibophele esihlahleni ngenxa yokungafuni ukuthunywa.
Isikhulumi samapholisa eMatabeleland North uInspector Glory Banda uthe isidumbu salo osengumuyi sitholakale silenga esihlahleni, sibotshwe ngocingo kuviki ephelileyo.
UThembinkosi Sibanda ubehlala logogo wakhe uNkosikazi Rebecca Sibanda (56) elayinini yeMpondo ngaphansi kukasobhuku uNgubo esigabeni senduna uMabhikwa.
Kubikwa ngeSonto edlulileyo uNkkz Sibanda wathuma uThembinkosi lomzawakhe ukuthi bayetheza inkuni ngaphambi kokuba bobathathu baye esontweni.
UThembinkosi kubikwa kazange akuthande ukuthunywa lokhu ngakho waziphumela ngendlela engayi enkunini kwahle kwaba yikucina ukubonakala.
Isidumbu sakhe sitholakale ngemva kwensuku ezimbili sesonakele.
“Umuyi lomzawakhe bathunywa ngugogo wabo ukuyatheza egangeni eliseduze lomuzi wabo. Bobabili basuka ngekhaya ngezikhathi ezitshiyeneyo uThembinkosi waphuma ngendlela engayi enkunini. Umzawakhe waphenduka lenkuni basuka logogo wakhe baya esontweni baze bayaphenduka ngehola lesithathu uThembinkosi elokhu engakaphenduki,” kulandisa uInsp Banda.
Kuthe ngosuku olulandelayo uNkkz Sibanda ebona ukuthi umzukulu wakhe lokhu engakaphenduki wayabikela usobhuku.
Izakhamizi kubikwa azisaphozisanga amaseko zahle zaphuma ijumo zayadinga uThembinkosi kodwa akaze atholakale.
Kuthe ngosuku lwesibili lokudinga izakhamizi zathola isidumbu sakhe silenga egatsheni lwesihlahla ngocingo zahle zabikela amapholisa.
Uthe uNkkz Sibanda utshele amapholisa ukuthi uThembinkosi wayehlala efuna ukuzibulala sonke isikhathi nxa engathunywa kumbe engakhuzwa.
“Ugogo kamuyi ubike ukuthi wayehlala efuna ukuzibulala nxa engathunywa kumbe engakhuzwa nxa enze okubi,” kutsho isikhulumi samapholisa.
Isidumbu sakhe asisahanjiswanga ukuyahlolwa imbangela yokufa ngoba umantshi weLupane uMnumzana Ndumo Masuku uthe kayikho indingekho yalokho.
Kusenjalo, amapholisa asekhuthaze uzulu ukuba adinge usizo ikakhulu nxa belenkinga zokukhulumisana labanye kulokuzibulala.
