uMthunywa
Cornelius Luphahla
KULENJIVA ebithethe isithembo eyethulwe isizibophele eChipale eBinga isibona ukufa kungcono nanko phela ibisijolelwa ngabafazi bayo.Injiva le, uMedias Tshuma uzibophele ngoMvulo kuviki ephelileyo kulandela ukujolelwa ngamakhosikazi akhe uNkosazana Lucia Mudimba obejola loMnumzana Tinashe Ncube kuthi uNkosana Agnes Ndlovu ubejola loMnumzana Vincent Sibanda.
Kuzwakale ukuthi uMnu Tshuma wathi ngesikhathi efika evela kweleSouth Africa wathola uMnu Ncube loMnu Mudimba sebezihlalela emzini wakhe okudale ukuthi asuke ayezibophela.
UMthunywa ukhulumisane loMnumzana Tawanda Mleya oyisihlobo sikaMnu Tshuma wathi wezwa sebizwa sokuthiwa uTshuma sezibophele yena esazi ukuthi useSouth Africa.
“Mina ngezwa sengibizwa emzini wami kuthiwa uTshuma sezibophele khonapha ngangisazi ukuthi kakho useSouth Africa. Ngathi ngifika ngathola sebemethulile selele phansi ngabuza ukuthi kuhambe njani bathi uthole omkakhe sebehlala lamanye amadoda emzini wakhe.
“Ngabuza umkakhe uMaNdlovu ukuthi angaphi amadoda la abebehlala lawo wathi sehambile emizini yawo wavuma lokuthi besebehlala emzini wakhe sibili,” kutsho uNkszn Mleya.
Ebuzwa ngale indaba uNkszn Mudimba uvumile ukuthi indaba enjalo yenzakala wathi kodwa khathesi isase kosobhuku basayilungisisa.
“Kuliqiniso sibili ukuthi umkami wasithola sesihlala lamanye amadoda ekhaya ngenxa yokuthi ubeseleminyaka emithathu engabuyi ekhaya njalo ubengasathumezi lutho. Lokhu kwadala ukuthi sidinge abangasinceda njengoba sasesisifa ngendlala.
“Ekufikeni kwakhe wasithola silele ezindlini zethu lamadoda la wasibona ngamehlo wasesuka ethi nxa kunjalo kungcono ayezibulala samlandela samthola esezibophele esihlahleni kwaba yinhlanhla ngoba wayesaphila samkhulula,” kulandisa uNkszn Mudimba.
UMnu Tshuma ebuzwa ngale indaba uvumile ukuthi yenzakala wathi wayesezonde kakhulu wabuya wathi umuzi wakhe kufanele ugeziswe.
“Kuliqiniso sibili ukuthi ngaxabana lamakhosikazi ami njalo uNcube loSibanda kufanele bagezise umuzi wami ngenkomo ezine ukuze ngikhululeke. Ngikhuluma nje indaba le ikosobhuku sisayikhuluma,” kuchaza uMnu Tshuma.
Usobhuku wakule indawo uMnumzana Atwell Dube ubikele intatheli ukuthi indaba enjalo usayikhuluma edale lakhe kakayiqedi.
“Indaba kaTshuma ngisayikhuluma lezinye izakhamizi edale lami ngakho kangikaqedi ukuyihluza indaba le noma nje kufanele ukuthi uNcube loSibanda bagezise umuzi kaTshuma,” kuphetha uMnu Dube.
