uMthunywa
Thokozile Mbedzi
KULENINA leMadumabisa eHwange elife ngemva kokutshaywa ngamagetsi ngesikhathi liphakathi kwesilugu senkukhu, uMthunywa ukuzwile lokhu.
Kubikwa uLillian Mhlanga oleminyaka engu-41 utshaywe ngamagetsi kuviki ephelileyo efakela inkukhu zakhe ukudla esilugwini.
Isikhulumi samapholisa esabelweni seMatabeleland North, uInspector Glory Banda uqinisekise ukuthi kulenina leMadumabisa elitshaywe ngamagetsi esilugwini senkukhu lafa.
“Inina leli langena esilugwini senkukhu ngehola lesikhombisa ntambama lifakela inkukhu ukudla, ngokusweleka kwenhlanhla lithe lizama ukulayitha phakathi kwesilugu lesi laselitshaywa ngamagetsi lawela phansi.
“Umntanakhe walandela ngemva kwesikhatshana esilugwini wamfica elele phansi. Umntwana lo uthe ezama ukuthi aphakamise unina laye ngokufanayo watshaywa ngamagetsi okwenza wabiza omakhelwane,” kulandisa uInsp Banda.
Kubikwa uMhlanga wathwalelwa esibhedlela seSt Patrick’s lapho abathi befika kwathiwa usedlule emhlabeni.
“Amapholisa eHwange kanye labomanjinela bamagetsi bahamba bayahlolisisa umumo bathola ukuthi indlela obekuxhunyaniswe ngayo intambo zisuka endlini zisiya esilugwini ibingaqondanga.
“Sithanda ukukhuthaza uzulu ukuthi nxa kufakwa intambo zamagetsi kwenziwe ngendlela eqondileyo ukuze kuvikelwe ingozi ezifana lalezi,” kuphetha uInsp Banda.
