uMthunywa
Gladmore Ncube
ZIBUKELE ibhayisikopo yamahala indlamanzi zeMathendele ePlumtree ngeviki ephelileyo kulandela ukubhuqana kwelinye inina kanye lendodakazi yalo bebanga indoda ebithandana labo bobabili.
UNkosazana Primrose Mthethwa uvoxwe yindodakazi yakhe uNkosazana Tariro Mthethwa kubangwa indoda okutholakale ukuthi nguMnumzana Phiri nje kuphela.
“Vele uyabe ucabanga ukuthi kuzaba lobuhle bani nxa umama lomntwana beqhubana ebhawa nsukuzonke bebuyela ngekhaya emadabukakusa,” kutsho uMnumzana Obrien Masuku.
Kubikwa laba ababili banathiswa nguye iPhiri lo akade sebembanga ebhawa.
“Kuyamangalisa kakhulu ukuthi indaba le khona beyidobha khathesi ngoba sihlezi sibabona kusa kwamalanga ebhawa betshintshaniswa. Kuthe ngeviki edluleyo uTariro wahamba ebhawa esiyadinga unina wamthola eqabujana loPhiri bahle badumelana khonapho,” kuchaza uMnu Masuku.
Intatheli itshayele uNkszn Tariro ucingo ngaloludaba othe yena kuphelile lokhu alakho loPhiri njalo unina uzabhadala icala lakhe lokumudla izithende.
“Sekuphelile okwami loPhiri ngoba bangenza ilema bathandana ngemva kwami, mina ngisithi ngilejaha kanti ngubaba wami. Okungizwisa ubuhlungu yikuthi umama kafuni kukhuluma lutho, uqina ngokuthi uyaxolisa.
“Manje mina angisoze ngimxolele uzalibhadalela icala lakhe. Sengisehlukana laye njalo angifuni kuzwa lutho ngaye.
Intatheli izame ukuxhumana loNkszn Mthethwa unina kaPrimrose kwehlula.
