uMthunywa
Abazali bami bathi abamfuni
KHulu: Ngiyakubingelela ngegama leNkosi ngithi philani kulo lami ngiphila kulo. Ngilomuntu ebengifuna ukumthatha manje abakithi bathi abamfuni inkinga yiyo leyi Khulu. Bathi kahloniphi ngitsho laboyisezala. Mina ngasengithume umuntu kibo njalo sebekwazi ukuthi kulomuntu obuyayo. Umama lo ngumuntu owaziwayo njalo labesilisa abanengi bayamazi lami sokuze kungithelela inhloni, mina kangisakwazi ukuthi ngenzeni Khulu ngicela ungibonise mntomdala mina sengiphelelwe ngoba okwaliwa ngabazali bami yinto ekhona lami angisamfuni phansi kwami.
Impendulo
Ngiphilile mzukulu wami, nxa umbhekisisa indlubu isizikhuphile ekhasini. Lumuntu ubonisile ukuba ungumhlobo ongalindwa nhlanyelo kungakho ke lawe kuhle ukuba utshiyane laye kulokuba ube uzimotshela ithuba lakho. Esintwini kakukuhlanga ukuba owesifazane aziwe yiwo wonke amadoda. Pho wena uzazigqaja uthini ngomuntu owaziwa ngumhlaba wonke. Njengoba ukubeka kuhle ukuba kawusamfuni kuhle ukuba umlande futhi umtshele ngomlomo wakho ukuba umuzi obufuna ukuwakha kawusaphumeleli njalo zikhona izenzo ezizele lokho. Kubi ukuhlala lomuntu wena ukwazi ukuba imizwa yakho kayikho kuye.
Ngibotshiwe
KHULU: Linjani? Ngiyindoda eleminyaka engu-44 yokuzalwa ngilonkosikazi labantwana abahlanu. Ngihlala endlini yethu ekhonapha koNtuthu lemuli yami lanxa nje kulezinsuku ngingasebenzi. Umkami uyahamba esiyawoda kwamanye amazwe ezothengisa ukuze siphile. Uhlupho nantu Khulu, mina kangisenelisi ukukhuluma loba kuyini emzini wami njengomuntu ogciniweyo. Okunye okungihluphayo yikuthi nxa ephuma elizweni ukuba yindoda kwami konke kuhle kuphele. Khulu angaze ayehlala inyanga yonke lami ngiyazihlalela. Kodwa angavele aphenduke lami ubudoda bami buhle buphenduke. Khulu sengilomkhumbulo wokuthi ngalungiswa ukuze nxa engekho ngingabi yindoda. Pho angafa ngizenza njani? Lokhu kungabe kusitsho ukuthi kangisoze ngenelise ukuhlangana lomunye umfazi? Nginceda Khulu.
Impendulo
Ngiphilile mzukulu, indlela obeka ngayo uhlupho lwakho ibonisa ukuba lawe kawuziphathanga phela. Wawuzama ukwenzani uze ubone ukuba inhloka kaligamuli nxa umama ephume phandle ngomsebenzi. Ukuzibamba yiyo impilo mzukulu hatshi ukuba lamehlo mehlo. Kuyazikhanyela ukuba wena ubotshiwe ukuba ungasali unikeza abanye uluju lukamama yena ngesikhathi eyesebenzela imuli yenu. Uhlupho olalo khathesi yikuthi uzaqala ngaphi ukubuza njalo uzakuthi wawusenzani uze ubone ukuba amagesti asala ewile nxa umama engekho. Kuhle ukuba ubone okhulu bakulungisele imbiza yabobaba, ezagezisa konke okukubophayo kodwa lokhu kakukuphi lungelo lokuhamba uthengisa izinto zikankosikazi wakho. Kudaba lwakho lokungenziwa ubaba endlini, lawe phuma phandle njengamanye amadoda udinge okungaphilisa imuli yakho kulokuba ulindele umfazi akuphathele konke nje wena uhlezi. Amanye amadoda ayabamba bamba phandle lapha pho yindaba wena ufuna ukufuywa ngumfazi ozaphinda akubophe futhi uphenduke ubeyinkabi.
Ngidinga umuthi wenhlanhla
KHULU: Ngilijaha elileminyaka engu-28 yokuzalwa, umama wabhubha ubaba kangimazi. Mina ngikhuliswe ngomalume, bangisa ngitsho lesikolo njalo ngapasa. Uhlupho lwami yikuthi umsebenzi kangiwutholi, ngicela Khulu ungidingele inyanga enganginceda ngomuthi wenhlanhla. Sengidubekile Khulu aluba ngiyazi ukuthi ubaba ungaphi ngabe kungcono. Ngilesifiso sokuthi lami ngigcine abantu abangondlayo. Kuze kube nini ngilokhe ngigcinwa?
Impendulo
Isifiso sakho sihle kakhulu mzukulu, uKhulu kangeke akudingela inyanga kodwa ulakho ukukunika amaso okuphila lokhu asencede inkulungwane zabantu. Nxa ubona ukuba ulohlupho mzukulu hlala phansi labomalumakho labo batsho ukuba ngosiko lwakibo uhlupho olunjengo lwakho baluphatha njani, njalo esikweni lwakibo kwenziwani. Labo balendlela abangakuphathisa ngayo lokhu babonisa uthando ngokukufundisa uze upase esikolweni. Kwesinye isikhathi singabiza umnyama kube kanti vele ithuba lakho kalikafiki kodwa lisesendleleni, lawe uzajabula njengabanye abantwana. Beka phansi isibindi uvathe ithemba uMdali uzakunikeza ubuhle lawe uzizwe uyindoda emadodeni. Okukayihlo akulasisindo lapha. Lamuhla ungabuyela uyedinga umuntu ongakodlanga ozafuna ukuvuna lapho ongalimanga khona.
Kuqondile ngithume abazali bami?
Khulu: Ngithemba uphilile, umzukulu ufuna indlela. Ngathola intombi ezimisele ukwakha ngempela kodwa mina laye savumelana futhi ukuthi ngimbalekise ngakibo aze ngakithi ngeqiniso kwabanjalo kwenziwa. Akukadluli inyanga kwenziwe sengicabange ukuthi kumele abakibo babekwazi futhi ukuthi umntanabo ukobani. Khulu kuqondile yini ukuthi ahambe lomzali wami kumbe akuvumi kufuna umuntu ongasimzali ngincedisa Khulu.
Impendulo
Indlela zokuthathana mzukulu ziyangamasiko abantu. Kukhanya lapha lagada isikepe lingasazi ukuba siyangaphi njalo sivela ngaphi. Lenza isiko elingalaziyo. Eqinisweni umuntu nxa efuna ukuthatha ubikela abazali kube yibo abanikeza indlela yonkwenza izinto eqondileyo. Lapha ngibona lina elibabili lazenzela nje umathanda. Kuyingozi ukuhlala lomntanabantu unganikwanga ilungelo ngabakibo. Nxa umuntu ebalekisiwe kuyabe kufanele ekuseni livuke lithumela idombo liyobika ukuba dingelani ngapha. Esintwini kuyabe kufuna ahambe lomuntu ongasi mzali wakho. Dingani isihlobo esiseduze kumbe umgani wemuli yenu limthume kube nguye usodombo wenu. Kahambi laye kodwa uyabatshela ukuba dingelani ngapha. Ngaleyondlela sekuzaqala ukukhulunyiswana ke.
Umkambi uyathambisa engutsheni
KHULU: Linjani ngidinga usizo oluvela kuwe ngiyintombazana eleminyaka engu-23 ngendile njalo silengane eyodwa. Uhlupho nantu Khulu umkami kanathi tshwala kodwa isimanga yikuthi ngathi ngilomthwalo wengane yakuqala wathambisa engutsheni ngathi mhlawumbe yikutshintsha komzimba khathesi umntanethu sele 2 years 7 months njalo sengilomunye umthwalo olenyanga ezingu-9 usephindile ukuthambisa. Ngenzeni Khulu uthambisa ebusuku silele. Yena uleminyaka engu-27. Nceda.
Impendulo
Ngendlela okubeka ngayo mzukulu kukhanya yisifo lesi esimvelele esekhulile njalo kutsho ukuba kukhona okuphambanisekileyo emzimbeni wakhe. Lokhu akufuni lambiza kaKhulu kodwa amadokotela wona azahlola izitho zomzimba wakhe. Ngabe yinto eyenzakala kanye ngabe sithi wajumisa kodwa nxa sekuhlala kusenzakala sekulohlupho olufuna isibhedlela. Kawusatshongo futhi ukuba yena uthini nxa likhulumisana ngalesisenzo. Akumbuzisise uzwe ukuba yena uthini.
