uMthunywa
Thokozile Mbedzi lo Ethel Ncube
KUDABA oluyimpicabadala kulomntwana oleminyaka engu-11 yokuzalwa oyintombazana weHwange omane wangenwa yinhlanzi emlonyeni ngesikhathi ethiya inhlanzi wafa.
ULindiwe Ngwenya ovela esiqintini seChachachunda, eHwange kubikwa wehlelwe ngamashwa la ngoLwesihlanu ngeviki ephelileyo bethiya inhlanzi ngezandla.
Kuzwakale ukuba uLindiwe wathi ephakathi komfula uDeka elabafowabo labodadewabo abane, bephakathi komfula bethiya inhlanzi ngezandla, inhlanzi encane yeqa isuka emanzini yangena emlonyeni kaLindiwe yayakuma emphinjeni.
Kubikwa udadewabo uRuvarashe wananzelela ukuthi uLindiwe wayesephefula nzima ngapha ekhombela emlonyeni, wasondela wavula umlomo kaLindiwe wabona umsila wenhlanzi emphinjeni.
Wazama ukuyidonsa kodwa wehluleka ngoba yayitshelela. Wambeletha wangena indlela yangekhaya ngenhloso yokuyadinga usizo kodwa wadinwa, wamtshiya endleleni wagijima wayadinga uncedo lukanina uWinnie Phiri.
Unina wagijima wathola uLindiwe esedlule emhlabeni elele endleleni elegazi emlonyeni kunye lemakhaleni.
Indaba le yabikelwa amapholisa eHwange.
Ekhuluma lentathethi uInspector Glory Banda uthe kulomntwana ongenwe yinhlanzi emlonyeni ethiya inhlanzi wafa.
“Sichwayisisa ngodaba lomntwana oleminyaka engu-11 ongenwe yinhlanzi emlonyeni ethiya labanye abane abaleminyaka ephakathi kwengu-4 le 17.
“Abahlanu laba babethiya inhlanzi ngezandla bephakathi komfula. Besathiya inhlanzi abahlanu laba uLindiwe Ngwenya wangenwa yinhlanzi emlonyeni yayakuma emphinjeni,” kutsho uInsp Banda.
Isidumbu sathwalelwa esibhedlela seHwange Colliery Hospital Mortuary ukuze kwenziwe ipost mortem.
