uMthunywa
Cornelius Luphahla
KULEZIZALWANE zeNkayi ezisungule inhlanganiso yokuthuthukisa abaculi abasacathulayo kanye lokuphakamisa ezemidlalo esiqintini seNkayi ngenhloso yokuthuthukisa intsha yakuleli.
Inhlanganiso le kuthiwa nguMphakathi Resource Centre njalo yasungulelwa esigabeni seMathetshaneni ngemva kokunanzelela ukuthi inengi lentsha lileziphiwo ezinhle kwezokuthokozisa uzulu kodwa lisuka liswele imali yokuzithuthukisa.
UMthunywa ukhulumisane lo co-ordinator wezomculo kule inhlanganiso uEddmore Moyo wathi inhlanganiso le sebelesikhatshana bayisungula njalo bangamalunga amanengi njalo bahlose ukuthuthukisa intsha kuphela.
“Inhlanganiso le sayisungula ngo2009 khathesi sesilamalunga angu-12 njalo inhloso yethu yikuthuthukisa intsha ikakhulu labo abaculayo labadlala ibhola. Ekusunguleni kwethu inhlanganiso le sananzelela ukuthi banengi ontanga abaleziphiwo ezinhle kwezokuthokozisa uzulu kodwa basuka baswele imali yokuzithuthukisa okudala ukuthi bengasafezi iziphiwo zabo.
“Ngalokhu thina siyabaphakamisa ngokubancedisa emaqenjini abo ezokucula ngokubafundisa sibuye njalo sibaphe imali esiyenelisayo njengenhlanganiso ukuthi baziphakamise,” kutsho uEddmore Moyo.
“Imali le esibancedisa ngayo siyikhupha ezikhwameni zethu ukuze sincedise intsha. Ekuncediseni kwethu lapha sibenzela ama-shows behlangene labaculi abakhulu ukuze bathole ulwazi kibo. Kusukisela ekuqaliseni kwenyanga ezayo sizakwenza ama-shows amanengi endaweni ezitshiyeneyo eNkayi ngenhloso yokuphakamisa abaculi ikakhulu abasasungula,” kutsho uMoyo.
Ekhuluma lentatheli uMdakomnyama ongumculi kamaskandi njalo elilunga lale inhlanganiso uthe bajonge ukuveza izifiso zabaculi abasasungula njalo laye uyabancedisa kakhulu abaculi abatsha ngendlela ezinengi.
“Injongo yethu njengenhlanganiso yikuveza iziphiwo zabaculi abasasungula emphakathini ukuze baphakame.
Okunye njalo mina njengomculi oselesikhatshana ecula ngiyabancedisa abaculi abatsha ngendlela ezehlukeneyo ukuze bathuthuke.
“Okwakhathesi sisancedisa abaculi abadabuka eNkayi kodwa ngokuya kwesikhathi sizabe sesincedisa labadabuka kwezinye indawo ezehlukeneyo ezikoMthwakazi,” kutsho uMdakomnyama.
