uMthunywa
Kukhanya sengathi inkampani yalapha ayimanga njalo ikhangelele ukuqala umnyaka ka2019 ngendlela ezaqinisa imizamo, amaphupho kanye lezifiso zabafundi, abazali, izikolo, labalobi bezingwalo ndawonye labaphathintambo bogatsha olubona ngezeMfundo yaphansi laphezulu.
Ukuthatha amanyathelo amatsha kuzifundo ze-ICT, abeDesignetics (PVT) Ltd bakholwa ukuthi i-DotEdu platform izadlala indima enkulu ekuthuthukiseni ukuphumelela kwabafundi ezikolo, ivimbe ukwehlukana ekufundeni iphinde iqinise ukuphatheka kwabazali ezifundweni zabantwababo nsukuzonke.
Okuhle ngokusebenzisa i-mobile application le yikuthi kutshengisa ukukhula komntwana nyangazonke okungaba lusizo kubazali ukuthi banake njalo babone ingqubela phambili yabantwababo bangalindeli usuku lokubonisana lababalisi (consultation day).
I-application le ilezinye indlela zokubona impumela zemihloliso okuzancedisa abazali ukuthi bahlale besazi ngempumela zemihloliso zabantwababo kungazange kulindelwe ukuphela kwethemu ukuze bamukele amabhuku abika impumela zabantwana (report books).
I-application le iyavumela ukuthi umzali enze izicelo esikolo abuye athole impendulo masinyane kungadingeki ukuthi ahambe kumbe atshayele ucingo esikolo. Ukuze kuthuthukiswe abafundi ngokusabalalisa ulwazi ngendlela yokufunda entsha (new curriculum), i-DotEDU ivumela ukubala amabhuku okufunda kuphela ngalokho ke uyenelisa ukuwathola lalapho okulamabhuku amalutshwana khona.
Abaqondisi beDesignetics bakholwa ukuthi iDotEDU mobile application kayisoze ivimbe ukufundela emdulini yamakilasi kodwa luzaqhelisa ububanzi kanye lesikhathi sokufunda endaweni ezingasebenzisi kakhulu ubulembu.
UMnumzana Richard Chirume onguMsekeli kaMqondisi weJunior Education kugatsha olubona ngezeMfundo yaphansi udlulise amazwi kaMhlonitshwa onguMphathintambo wogatsha lwezemfundo uSikhwicamfundo uPaul Mavima athi: “Ugatsha lwethu selukhethe ukusebenzisa uhlelo olulempumela enhle oludinga njalo ukuthi abafundi bamukele izifundo zama-ICT. Izikolo zethu zonke sezamukele ama-ICT njengezinye inhlangothi zokufunda ngakho i-dotEDU ifike ngesikhathi esiqondileyo.
“Kuyathabisa ukuthi njengomphathintambo obona ngemfundo yaphansi nginanzelele ukuqakatheka kwe-dotEDU ekuthuthukiseni imfundo ngendlela elula, ehlolisisiweyo njalo eqondileyo. Lokhu kuhambisana lomgomo wezokuthuthukiswa wesine ekunikeni kanye lekusekeleni ukwakha intsha epheleleyo kusukela kwabancane kusiya kulabo abafunda okungekho emthethweni (non-formal). I-application ye-dotEDU izadlala indima ebalulekileyo ekuthuthukiseni ukuphumelela kwabantwana ezikolo iphinde yehlise inani labantwana abekela isikolo.
“Silethemba ukuthi ngale i-application, ukuphathwa kwezimali ezikolo kuzathuthuka. Ngithanda njalo ukutshayela ihlombe intsha yeZimbabwe ngemizamo asebeyenzile nanko phela ngizwa kuthiwa inkampani yeDesignetics ilawulwa ngabasakhulayo. Lokhu kutshengisa ukuthi intsha ilomsebenzi omkhulu ekuthuthukiseni imfundo yeZimbabwe.”
IDesignetics (PVT) Ltd yinkampani yama-ICT eyasungulwa yakhuliswa nguMnumzana Lovemore Chirongo ukuze kufakwe izindawo ezihambelana lama-ICT kanye lezixazululo ezizathuthukisa impilo zabantu be-Africa mihla ngemihla.
“Kulithuba elihle ukuthi sethule i-platform elusizo njalo ezaletha intuthuko elizweni lethu leZimbabwe lapho esikholelwa ukuthi asenzeli kuphela abafundi, izikolo kumbe abazali kodwa labo ababumba okuqukethwe kumfundo kanye labalobi bamabhuku ngokusebenzisana okuzabanika amandla kuphinde kubenze babelolwazi ngempahla etshiyeneyo,” kuchaza uMnu Chirongo, onguye uMsunguli kanye loMphathi Omkhulu weDesignetics (PVT) Ltd.
