uMthunywa
Thokozile Mbedzi
ZILOKHU zinkemile izakhamizi zeMpoengs ePlumtree kulandela ukuzwa ngabantwana ababili abatshaywe ngamagetsi kuviki ephelileyo.
Abantwana ababili laba, omunye oleminyaka eyisificaminwe mibili, omunye oleminyaka eyisificamunwe munye abalokhu belalisiwe esibhedlela se-United Bulawayo Hospitals koBulawayo kubikwa babehamba bebathathu bevela esikolo baze behlelwe yingozi le.
Esinye isakhamuzi esikhulume loMthunywa uNkosazana Rosemary Ngwenya uthe njengabazali balokhu betshwaqe umzimba ngesehlakalo lesi.
“Kwenzakale okunye lapha endaweni yethu.
Intambo zamagetsi lezi bezilengele endleleni.
Abantwana laba bathe besedlula bevela esikolo omunye wabo wasethinta intambo lezi okuyikho okwabangela ukuba batshaywe ngamagetsi.
“Omunye lo ababehamba laye yena waphepha kule ingozi,” kutsho uNkszn Ngwenya.
Isikhulumi samapholisa eMatabeleland South ulnspector Loveness Mangena ebuzwa ngodaba lolu uthe solufikile ehofisini yabo.
“Samukele umbiko wabantwana abatshaywe ngamagetsi kulandela ukuthinta intambo ebeziphansi.
“Abantwana laba basesibhedlela se-UBH lapho abelatshwa khona,” kuphetha ulnsp Mangena.