uMthunywa
Ethel Ncube
INDUNA uGampu yeTsholotsho isisukumele phezulu yazimisela ukulwisa ukuhlukuluzwa kwabantwana esigabeni okucina kubangela ukuthi bazithwale kumbe bacine besenda besasebancane.
Lokhu kuza ngemva kokuba kuvele indaba yomntwana oleminyaka yokuzalwa engu-9 okubikwa uzithwele njalo usesibhedlela lapho akhangelwa ngodokotela kulindwe ukuthi abelethe.
Umntwana lo usuka esigabeni senduna uGampu kungakho induna isebenzisana lezinye inkokheli kanye lezinye inhlanganiso sebethethe inyathelo lokuthi kulwise ukuhlukunyezwa kwabantwana ikakhulu abangamankazana.
Induna uGampu kusitatimende esinikeze intatheli koBulawayo ithe lokhu okwenzakale emntwaneni lo kubi njalo kumele kudingwe indlela zokuthi kungabi labanye abantwana abacina bezithwele bebancane.
Induna uGampu ichaze ukuba ngesikhathi isizwa lumbiko ongekho muhle yasukuma yayafika ngakibo kwalumntwana.
“Indaba le yathi ifika kimi ngasukuma ngaya ngakibo kwalumntwana ngathola ugogo womntwana ngakhuluma laye ngendaba le. Wangibikela ukuba umntwana waqala ukuthomba evele emncane kanye lokunye njalo. Sifuna umntwana lo athole ukulwelwa okufaneleyo, kuthi lo owamhlukuluzayo athole isijeziso esimfaneleyo ngoba lokhu akwenzayo kuyisihluku esiphindiweyo,” kubika induna uGampu.
Uqhubekele phambili wathi njengesigaba balenhlelo asebezisungulile ezizaphathisa ekufundiseni abantu ikakhulu abantwana ngamalungelo abo kanye lobubi bokuhlukuluza abantwana.
“Kulenhlanganiso esikhona esiqale ukubhoda ifundisa abantu ngokuhlukuluzwa kwabantwana silethemba ukuba kuzangena ebantwini bakuzwisise silwisane lamacala afana lala.
Abantu nxa behlukuluzwa kumbe ubona umuntu ohlukuluzwayo sikhangelele ukuthi sibafundise ngama-suggestion boxes lokuthi bangabhala yiloba yini eyimfihlo bayifake ku-suggestion box ukuze kungaziwa ukuthi yibo abakhulumileyo ngodaba olungabe lukhona,” kubika induna.
“Ngikhuluma nje sokulamanye amacala asethutsha lakuma-group kunkundla zokuxhumana abantwana abamithiswa bebancane okumele sizikhangele. Ngithanda ukukhuthaza izakhamizi emakhaya ukuthi zixekane lokwendisa abantwana besasebancane.
“Ngidinga ezinye inhlanganiso ezingasixhasa ukuthi sitshumayele ivangeli leli kundawana zonke zelizwe ngoba kukhanya udubo lolu luyanda kusa kwamalanga.
“Abazimiseleyo bangeza endaweni yethu sikhulume izakhamizi zami zifundiswe zibe lolwazi olujulileyo labantwana labo bafundiswe ngamalungelo abo ukuze nxa behlukunyezwa benelise ukukhuluma,” kuphetha induna uGampu.
