uMthunywa
Thokozile Mbedzi
KULENDODA yeChiredzi efe ngemva kokuhlaselwa lemuli yayo ngoguluva abangene emzini wakhe phakathi kwamabili kuviki ephelileyo befuna imali.
Kubikwa uHillary Votsho oleminyaka engu-37 yokuzalwa wezwa umsindo wavuka esiyalunguza uthe engena endlini yokuphumula wahlangana laboguluva laba abahle baqala ukumhlasela ngezigodo umzimba wonke andubana bamhlahlele ngesikhali esibukhali kabili ekhanda sebehamba okuyikho okwabangela ukufa kwakhe.
Ekhuluma lentatheli kaMthunywa uMnumzana Melusi Sibanda uthe okwenzakale komakhelwane wabo kuyethusa.
“Sibone into yamehlo, silapha siyesaba ngoba singazi ukuba nxa litshona silala sizavuka singabaphilileyo yini ngoba okwenzakale kumakhelwane wethu kuhlasimulisa umzimba.
“Ungenelwe ngoguluva bamhambisa kwelamathonga. Kukhanya bathi belele lonkosikazi wakhe bezwa umsindo, wasevuka uVotsho kanti yayisiwuchithile umuthi inkonyane.
“Uthe engena endlini yokuphumula, wahlangana lamadoda amathathu athi afuna imali andubana aqale ukumtshaya ngezigodo emethusela efuna imali bamtshela ukuba kabuyele endlini yakhe yokulala abaphe imali alayo.
“Wawanika iUS$800 andubana athi esephuma abuye amhlasele ngesikhathi esicijileyo kabili ekhanda wahle wafela lapho,” kutsho uMnu Sibanda.
Kubikwa babuye bathatha omakhalekhukhwini babo kunye lamakhiye emota bahamba batshiya unkosikazi wakhe lomntwana oleminyaka emine.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini.
“Udaba lwendoda ehlahlelwe ngesikhali esicijileyo ekhanda yafa sisaluchwayisisa.
“Sicela ongabe elolwazi olungasiza ukuthi kubotshwe amadoda la azise amapholisa aseduzane laye,” kuphetha uInsp Dewa.
