uMthunywa
Thokozile Mbedzi
KUBATSHAZWA isihluku sendoda eleminyaka engu-35 yokuzalwa esolwa ngokubulala umkayo ngokumkhanda ngezipanela, kusehlakalo esenzakale endaweni yamabhizimusi yeCostas eMberengwa ngeviki ephelileyo.
Kubikwa uLouis Mukondiwa oleminyaka engu-35 weNorthwood eMberengwa ubulele unkosikazi wakhe uTafadzwa Zhaimu oleminyaka engu-37 egangeni kulandela ukubonakala bengena iganga bethwele izipanela.
Ekhuluma lentatheli kaMthunywa uNkosazana Sibongile Dube uthe isidumbu sikaZhaimu sitholakale siphakathi kwechibi legazi simanxebanxeba.
“Silapha sididekile ingqondo ngokwenziwe nguMukondiwa. Akukho obenakanela ukuthi bayaxabana ngoba bebehamba kuhle bobabili bengena iganga bethwele izipanela okukhanya ukuthi yizo ezasetshenziswa ukumbulala.
“UMukondiwa wacela unkosikazi wakhe ukuthi amncedise ukuthwala izipanela ufuna ukuyalungisa okunye. Njengoba nje abadala besitsho ukuba elokufa kalitsheli, wasukuma wamphelekezela engazi ukuthi uselukelwe icebo lokubulawa.
“Ekufikeni kwabo egangeni kukhanya uMukondiwa wajika wavuka eseganga watshaya unkosikazi wakhe kanenginengi ngezipanela umzimba wonke waze wafa,” kuchasisa uNkszn Dube.
Kubikwa uMukondiwa esedale icala leli wacela ezinyaweni watshiya isidumbu somkakhe egangeni siphakathi kwechibi legazi.
Ngezikhathi zemini abanye ababesedlula kuleloganga bathola isidumbu sikaTafadzwa sisechibini legazi bahle babikela abanye endaweni yamabhizimusi kwasekusiya bikelwa amapholisa ngodaba lolu.
Isikhulumi samapholisa esabelweni seMidlands uInspector Emmanuel Mahoko ebuzwa ngodaba lolu uvumile wathi basachwayisisa.
“Sichwayisisa udaba lwendoda ebonakale ihamba lonkosikazi wayo ithwele izipanela idlula endaweni yamabhizimusi ngehola lesibili ngemva kwemini.
“Ngemva kwesikhathi bathola uTafadzwa esefile elamanxeba.
“Amapholisa asaphenyisisa ngodaba lolu njalo kucelwa ongabe elolwazi lalapho okuloLouis Mukondiwa abikele amapholisa aseduzane laye,” kuphetha uInsp Mahoko.
