uMthunywa
KULEVIDIYO etshwaqisa umzimba esabalale kunkundla zokuxhumana ngempelaviki nanko phela itshengisa indoda akade isilwa lesilwane.
Indoda le kayilwanga nje kuphela lesilwane kodwa icine isibulele. Lokhu kumangalise wonke umuntu esigabeni indoda le edabuka khona.
Kubikwa indoda le okungasatholakalanga igama layo yahlangana lesilwane lesi eduzane lomuzi wayo kodwa kayizange ibaleke yamane yaqala ukulwisana laso.
Kumifanekiso esabalale kunkundla zokuxhumana lindoda okubikwa ukuthi idabuka CMS esigabeni se-Iganga isele ilamanxeba esabekayo ngemva kokulwisana lesilwane lesi.
Kumifanekiso le indoda le kukhanya ilamanxeba amanengi esifubeni kanye lasemhlane. Ingalo yayo yesandla sokunxele kukhanya yephukile njalo ibhanditshiwe yasisekelwa ngenye indoda emi eceleni kwayo.
Ilamabhanditshi njalo ebusweni entanyeni kanye lezinye izitho zomzimba. Umfanekiso wesibili utshengisa isilwane esifileyo.
Abasiki bebunda bathi isilwane lesi samane sathutsha eduzane lomuzi walindoda okwenza abantu abanengi babaleka ngokwesaba.
Yiloba isilwane sisaziwa njengenyamazana eyingozi kakhulu ebantwini lindoda kubikwa kayizange yesabe yamane yeqa yalwa lesilwane.
Kubikwa njalo ayizange isebenzise isikhali ngitsho lesisodwa njalo akula oweza ukuzoyincedisa kodwa yenelisa ukusinqoba yasitshiya sesifile.
Yiloba kubikwa ukuthi amanxeba alindoda akusimanxeba angayibulala abantu ikakhulu izihlobo zayo bathuthumele ngoba bethi ngeke umuntu alwe lesilwane asale ephila. Lindoda elesibindi sesilwane isigcwele kunkundla zokuxumana emazweni amanengi.
Abantu abanengi bebencoma lindoda ngesibindi sayo kodwa abanye bayisole kakhulu ngokubulala inyamazana kulokuthi ibize ababona ngenyamazana zendle ukuthi bazosithatha. — Ubulembu
