uMthunywa
YiNtatheli kaMthunywa
KULENDODA yeGwabalanda koBulawayo etshiye izihlobo labomakhelwane zitshe amathe kulandela ukutshaya umntanakhe olomnyaka owodwa ngesicathulo angathi ngumuntu osefikelwe lidlozi ngoba ekhala kakhulu.
UMoses Sibanda oleminyaka engu-25 yokuzalwa kubikwa ngoLwesihlanu lweviki ephelileyo watshaya umntanakhe lo ngesicathulo esola ukuthi kungani engathuli.
UMthunywa ukhulumisane loZanele Ncube ongudadewabo kaSanele Ncube ongumkaMoses Sibanda oveze ukuthukuthela ngesenzo sikaSibanda.
“Mina okunje ngiyaqala ukukuzwa lokhe ngazalwayo ukuthi umuntu uyatshaya usane oluncane ngesicathulo.
“Kanti vele ngubani owathi umntwana uyatshaywa kakhulu emncane kangaka. Ngelanga kusenzakala lokhu umnawami wayephume watshiya uMoses elomntwana.
“Omakhelwane basala besizwa umkhosi womntwana ekhala engathuli labo kwabamangalisa ukuthi umntwana aze ahlabe umkhosi kutheni kodwa bakutshaya indiva,” kutsho uZanele.
Kubikwa unina womntwana uSanele wathola umntwana elokhu ekhala wathi ebuzisisa kumkakhe ukuthi kwenzakaleni ngoba ebona umntwana elemvimvinya umkakhe wathi umtshayile ngoba ubengafuni ukuthula.
Njengemuli sesihlale umhlangano wokuthi siyembophisa kodwa umkakhe uyamvikela,” kuchaza uZanele.
UMthunywa ukhulumisane loSanele Ncube othe akulanto enjalo eyenzakeleyo.
“Lina likuzwe ngobani khonokho, akulanto enjalo eyenzakalayo,” kutsho uSanele.
UMthunywa uzame ukukhulumisana loMnu Sibanda kodwa wehluleka ngoba ubengabambi ucingo.
