uMthunywa
Thokozile Mbedzi
ZILOKHU zibabaza izakhamizi zeMatopo ngemva kokuba kutholakale isidumbu senye indoda sesonakele sokunyakaza impethu.
Umuyi uPoslee Ncube obeleminyaka engu-62 utholakale efile izolo emzini wakhe sekunuka lasemgwaqweni.
UNcube kucatshangelwa ukuba angabe ebeselamaviki amabili ebhubhile nanko phela omakhelwane bakhe baveze ukuthi bacina ukumbona mhlaka 1 Nhlolanja.
Omunye wezakhamizi zakulindawo othande ukwaziwa ngokuthi nguSibongokuhle Khuphe uthe balesithuli ngokudlula kukaNcube.
“UNcube ubevele ezihlalela yedwa, sonke nje besisithi uziphilele emzini wakhe singazi ukuthi sokonakele. Omunye umakhelwane nguye othe esedlula emgwaqweni esiya emfuleni wezwa iphunga livelela emzini kaNcube wabikela abanye omakhelwane bahamba besiyakhangela.
“Sithe sifika njengabomakhelwane safica isimo sisibi njalo okusuke kwasizwisa ubuhlungu kakhulu yikuthi abaseduzane laye bathi bamcina mhlaka 1 Nhlolanja okungabe kusitsho ukuthi mhlawumbe waphatheka emzimbeni waswela usizo njengoba amalanga abesemanengi kangaka,” uNkkz Khuphe.
Uqhubekele phambili njalo esithi ulenhloni ngesiga lesi ngoba kuveza ukuba akulathando kubomakhelwane.
“Ngilapha ngilenhloni njengesakhamuzi sakulindawo, kusiveza singabantu abanjani emphakathini umuntu aze abole kungela loyedwa oke wazihlupha ngokumdinga khona kusazakala ukuthi uhlala yedwa.
“Lokhu kusikhuphe isithunzi sonke ngoba akula oke wazihlupha ngokudinga ukuthi uNcube ungaphi,” kulandisa uNkszn Khuphe.
Esinye njalo isakhamuzi uMnumzana Dumisani Thebe uveze ukuthi lokhu elesithuli ngokufa kukakhulu uNcube.
“Ngilokhu ngilesithuli ngokufa kukaNcube ngoba kubuhlungu ukutshiywa ngumuntu omdala esigabeni, kuba lesikhala esikhulu. “Sihle sayabika udaba lolu emapholiseni njalo lokhu sizibuza ukuthi kahle kahle kwenzakaleni impendulo kasiyitholi, silethemba abomthetho bazasixazululela insindabaphenduli le esehleleyo,” kutsho uMnu Thebe.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe udaba lwendoda etholakale ifile emzini wayo ebihlala yodwa solufikile ehofisini yabo ngakho abantu kabangahlali bodwa njalo labomakhelwane kabahlale bekhangelana ngaso sonke isikhathi.
