uMthunywa
Langelihle Moyo
KULENDODA yeBinga esiqintini seBhulayo ngaphansi kwenduna uBinga efe ngemva kokuhlaselwa yingwenya isikha amanzi eLokola Fishing Camp kumfula uZambezi.
Kubikwa mhlaka 11 kuyonale inyanga ngehola lesithupha ilanga selisiya ngomtsha wendoda uPeter Muntanga (52) obesebenza ukuthiya inhlanzi eLokola Fishing Camp wayesikha amanzi ngezigubhu zakhe ezimbili ezama-5 litres kumfula uZambezi aze ehlelwe yila amashwa.
Kuzwakale ukuthi uHilder Munkuli oleminyaka yokuzalwa engu-34 wayegeza bucwadlana lalapho uPeter ayesikha khona amanzi. UMunkuli wezwa umsindo omkhulu owawuvelela lapho uPeter ayesikha khona amanzi.
Kusenjalo uMunkuli wabona ingwenya idonsela uPeter emanzini. Uthe ebona lokhu wagijima wasondela eduzane, wadobha amatshe wajikijela ingwenya ngapha ehlaba umkhosi esithi mhlawumbe izethuka lokuthi abize abanye bazomncedisa. Kuthe ngemva kwemizuzu elitshumi kwafika umfowabo kamuyi uGaster Muntanga oleminyaka yokuzalwa engu-48, bancedisana beqhubeka bejikijela ingwenya yacina icwila phansi emanzini lomzimba ka-Peter.
Kubikwa kwafika abanye abathiya inhlanzi abababikela ukuthi babuye ngemva kwamahola amathathu.
Intatheli kaMthunywa ibuye yezwa ukuthi mhlaka 12 kuyonale inyanga ngehola lika 12 ebusuku, kwezwakala umsindo owawuvelela emfuleni, abazange baphozise amaseko bahle bagijima bayakhonale bephethe izibane. Ekufikeni kwabo babona ingwenya le isembundwini womfula idonsa umzimba ka-Peter basebeyijikijela ngamatshe yaze yabuyela emanzini yawutshiya.
Isikhulumi samapholisa eMatabeleland North uInspector Glory Banda, uthe udaba lolu lwafika endlebeni zamapholisa ahamba ayafika lapho okwenzakale khona.
“Udaba lolu lwabikwa emapholisa ahamba ayafika lapho okwenzakalela khona. Akukho okubi okucatshangelwayo kwenzakala kumufi,” kuphetha uInsp Banda.
