uMthunywa
Langelihle Moyo
KULENDODA yeGokwe ngaphansi kwenduna uChireya eleminyaka yokuzalwa engu-49, efileyo ngemva kokunatha umvusankunzi.
Kubikwa uIsaac Kabarapate (49) wavakatshela enye inyanga mhlaka 13 kuyonale inyanga esiyadinga umvusankunzi yamnika kodwa ngemva kokunatha umuthi awunikwayo waqala ukubulawa yisisu wacina esehlanza igazi.
Isikhulumi samapholisa eNkabazwe uInspector Emmanuel Mahoko ubike ukuthi unkosikazi kaKabarapate wavuka ekuseni esiya esivandeni esiseduzane lomfula u-Ume andubana afice umkakhe eselele phansi egangeni esephathekile.
Kubikwa ekuphendukeni komkakhe, umalukazana owayesele ngekhaya, wamazisa ukuthi uKabarapate ulele egangeni elibucwadlana lomuzi njalo uthi isisu sibuhlungu.
Umkakhe kazange aphozise amaseko wahle waqonda kuleloganga lapho athi efika uKabarapate wamazisa ukuthi ubehambe wayadinga umvusankunzi enyangeni ethiwa nguMcDonald Ndlovu. Kubikwa ngemva kokunatha lowomuthi isisu saba buhlungu wabuye waqala ukuhlanza igazi.
Ngosuku olulandelayo mhlaka 14 ngemva kwamabili umkakhe lomfowabo bathwalela uKabarapate eChireya Mission Hospital ngoba isimo sesibi kodwa ngokusweleka kwenhlanhla wadlula engakafiki esibhedlela.
Isikhulumi samapholisa eNkabazwe uInspector Emmanuel Mahoko uthe udaba lolu lusezandleni zamapholisa njalo inyanga le isibotshiwe.
“Amapholisa asachwayisisa ngokugcweleyo ngodaba lolu, lenyanga le isezandleni zamapholisa. Umzimba womufi uhanjiswe esibhedlela se-United Bulawayo Hospitals ukuze kuhlolwe imbangela yokufa i-post-moterm,” kuphetha uInsp Mahoko.
