uMthunywa
Cornelius Luphahla
ZIBABAZA zingaqedi izakhamizi zesigabeni seDongamuzi eLupane ngemva kokuba eyinye indoda lemuli yayo ifakelwe ngumnewabo ezithelweni ze-mango yafelwa ngumntwana oyedwa abanye basilela esibhedlela.
Isiga lesi senzakale kuviki ephelileyo lapho uMnumzana Philani Ngwenya afelwe khona ngumntanakhe oyedwa abanye basilela esibhedlela okucatshangelwa ukuthi ubefakelwe ngumnewabo uMnumzana Mayford Ngwenya.
Kuzwakale ukuthi izithelo lezi zahlanyelwa ngabantu asebabhubhayo ngakho abantwana balabobantu bayazibanga osekudale ukuthi uMnu Ngwenya afakelwe ngumfowabo kuzo.
UMthunywa uxhumane lomunye wezakhamizi zakule indawo uNkosazana Sithabile Mathonsi walandisa ngendaba le ethi kalankani ngayo njalo ukholwa ukuthi isiga lesi senziwe ngumnewabo kaNgwenya.
“UNgwenya lomnewabo bahlala bexabana bebanga izithelo zama-mango ezatshiywa nguyise ngemva kokufa kwakhe. Ngokunjalo kuviki ephelileyo baxabana kakhulu kwathi ngemva kokuba uNgwenya ekhe izithelo lezi wazidla labantwabakhe abahlanu kanye lomakhelwane wakhe uSibanda bahle baqalisa ukugula bebulawa yizisu.
“Ngalesosikhathi sabathwalela ekilinika yeDongamuzi bafika badluliselwa esibhedlela seSt Luke’s. Esibhedlela lapha bafika bathi badle itshefu, ngokuswelakala kwenhlanhla kwabhubha umntakaNgwenya obeleminyaka engu-6. Ngokunjalo kakho owathandabuzayo ukuthi bafakelwe ngumnewabo ngoba wayehlala esithi bazazibonela ngoba badla ama-mango kayise,” kuveza uNkszn Mathonsi.
Ebuzwa ngale indaba uMnu Ngwenya uvumile ukuthi yenzakele wathi uzwa ubuhlungu ngokubhujelwa ngumntanakhe njalo kakwazi ukuthi ngubani owabafakelayo.
“Mina ngadla ama-mango lemuli yami nganika lomakhelwane wami sahle saqalisa ukugula sibulawa yizisu. Lokhu kwangimangalisa kakhulu ngoba sihlala siwadla kodwa singaguli. Ngemva kwalokho ngabhujelwa ngumntanami ebulawa yisisu, indaba le ingizwisa ubuhlungu futhi kangikwazi ukuthi ngubani owasifakelayo,” kutsho uMnu Ngwenya.
UMnu Mayford Ngwenya onguye okucatshangelwa ukuthi nguye owafakela umnawakhe uthe yena kazi lutho laye wezwa sokwenzakele.
“Mina kangikwazi ukuthi umnawami lemuli yakhe babebulawa kuyini kodwa ngezwa sokuthiwa umntanakhe usebhubhile.
“Okunye njalo kangilwi lomuntu mina kodwa abantu yibo abalwa lami. Ukuthi ngobani labo bantu ngeke ngikuchaze kodwa bona bayazazi,’ kuphetha uMnu Ngwenya.
