uMthunywa
Thokozile Mbedzi
SISEYINDABA egudwini isenzo esenzakale esigabeni seGokwe ngaphansi kwenduna uChireya lapho okubikwa ukuba impisi zigade engalaneni yenye indoda ‘zadla’ amabhele amahlanu otshinda abelapho.
Isehlakalo lesi senzakale kuviki ephelileyo njalo lokhu kunathiswana ngaso itiye esiqintini sakoChireya.
Kubikwa uMnumzana Isaac Chiramba wathi eqeda ukuvuna utshinda lwakhe walubeka engalaneni elindele ukuthi ayeluthengisa impisi zafika zadabula amasaka lawo zaludla olunye zaluhaza phansi umuzi wasala umhlophe okongqwaqwane.
Induna yakule indawo uChiya Chireya ithe kubuye udaba oluyisimanga enkundleni yakhe ngeviki ephelileyo.
“Kubuye udaba oluyisimanga enkundleni yami ngemva kokuba uMnu Chiramba ehlelwe yisiga emzini wakhe lapho esevune utshinda lwakhe walufaka engalaneni andubana ayoluthengisa.
“Kwathutsha impisi ebusuku zadabula amasaka wonke zadla utshinda olunye zaluhaza phansi.
Amasaka omahlanu abesengalaneni adatshuliwe kwadliwa utshinda.
“UChiramba ufike lapha etshe amathe ethi lokhu wathwetshulwa yingwe kakaze ezwe ukuthi impisi zidle utshinda.
“Akuvamanga ukuthi sizwe ukuthi impisi idle into engelagazi ize ilwisane layo. Njengesigaba esilokhu sikholwa kwezomdabu, nxa kungenzakala iziga ezifana lalezi siyahlala phansi njengabakhokheli besigaba sidingisise ngakho ukuze siphume lesisombululo.
“Njengomkhokheli womdabu indaba le iyisimanga futhi ingipha umthwalo wokuthi kumele kudingwe kutholakale ukuthi lokhu okwenzakeleyo kubangelwe yini,” kuphetha induna uChireya.
