uMthunywa
ZIBAMBE owangaphansi izakhamizi zeChilombwe kweleZambia ngemva kokuzibonela ngawabo isikhwama sitshintsha sisiba yinyoka ezandleni zesela.
Inkemenkeme le yenzakale ngoMvulo ekuseni lapho isela leli elitshontshele omunye umdlali webhola isikhwama semali.
Kubikwa isela leli elaziwa ngokuthi Amozey elileminyaka yokuzalwa engu-27 liphose laqaleka libona isikhwama ebelisitshontshele umdlali webhola sitshintsha sisiba yinyoka.
Abafakazi abaqotho ababona lokhu kusenzakala baveze ukuthi uAmozey emva kokuba atshontshe isikhwama wabuya walandela umnikazi waso esiyagada umtshova efuna ukuba ambisele.
“Isikhwama lesi wasitshontshela umdlali wasesiyacatsha ngemva kwebhakane uthe ezama ukusivula yikho lapho esitshintshe khona saba yinyoka.
“Uthe ebona kunjalo walandela umdlali lo kodwa uhlupho kwaba yikuthi wasiphika isikhwama sakhe waze waveza okunye okungathi yisikhwama ethi lesi esiyinyoka kayisiso sakhe.
Kubikwa inyoka yakhona ibingalumi kodwa ibithe daca nje ezandleni zakhe kodwa esehluleka ngitsho lokuthi ayilahlele phansi, okuyisibonelo sokuthi bekungumvuzo wakhe.
“Amapholisa eza ngemva kokuxokozela kwabantu kodwa abazange benze lutho. Ngakho njengoba umnikazi wayelokhe esiphika bekungcono bayebona inyanga ezamkhipha isinyama lesi,” kuchaza umfakazi lo.
Ipholisa ebelikhona lapho lithe akulanto abangayenza ngaphandle kokuba babize ababona ngezinyamzana abeParks and Wildlife Management Department. — Ubulembu
