uMthunywa
Mehleli Dube
Thina esikhule ensukwini zayizolo, sikhule amalunga omdeni emanyene njalo elokuzwelana, ngikhumbula indoda ezala mina ingixoxela ukuthi kwathi sekumele iye ezifundweni zaphezulu (i-A-level), umdeni wavumelana ukuthi sekumele ayedinga umsebenzi ukwenzela ukuthi aphumuze abazali anakekele abanawakhe.
Loba ungakubona angani kwakuyincindezela yena uthi laye wakubona kufanele ukuthi aphumuze abazali ejogweni lokufundisa abafowabo sibi sabazukulu.
Ilunga elilodwa laliwuphucula umdeni walo kungela mpehlane yomoya omubi osungene imidenini eminengi.
Kulezinsuku uthola kungakhulunyiswana, ungadingisisa lento ebangwayo abayazi.
Omunye angaba lenhlanhla abelemali sefuna amalunga omdeni amguqele, aze afise lokuthi ngabe bayamesula nxa eqeda kukhama ithumbu esambuzi, ukuze kukhanye ukuthi kukhala esakhe isicathulo.
Khathesi ufica abantwana bezelamani bengazani, omunye uyabe ehlala lemuli yakhe emazweni angaphetsheya kolwandle abanye bengabahlala emazweni afanana laboNingizimu Africa ahlale umuntu angabuyi ekhaya eze nxa kuthe kwaba lomonakalo onjengemfa, ngenxa yendleko zokuhamba atshiye imuli yakhe khonale, aze ethubezela njengothubayi wendwangu ehamba yodwa emaqaqeni idinga inkume.
Abanye ngabaloba bekhonapha emadolobheni bangalugxobi emakhaya utshabalale umdeni lezimuli. Ungakhangela ngendlela imideni lezimuli okudilika ngakhona eminyakeni elitshumi ezayo kuyabe kungasela lutho, umakhelwane wakho nguye oyabe esekumela njengelunga lemuli kumbe elomdeni, isimanga abanye bafundiswa ngabafowabo kumbe baphuculwe yibo njalo ngokubangenisa emisebenzini okuholwa khona ngengowane kodwa bethi nxa sebezibona sebengabantu emphakathini bakhohlwe lapho abavela khona njalo lokuthi impilo livili kutshintshwana lamhla nguwe kusasa ngomunye.
Asizameni ngamandla wonke ukuthi umdeni lezimuli kungatshabalali ngoba singayekethisa kuzatshabalala amasiko ethu sifane lezimvu ezingela malusi ezihlaselwa ngamakhanka emini ligwaze umhlaba.
Qalisa lamhlanje, bathinte abomdeni wakho ngomakhalekhukhwini wakho uthi salibonami ngizalivakatshela ngempelaviki.
Ayixabene.
Umlobi ungamthinta ku: 0714355641
