uMthunywa
EMHLABENI wonke jikelele amapholisa akhangelelwe ukuthi abe ngabantu abagcina umthetho welizwe njekulondwa kwawo kusisekelo sombuso welizwe. Kwelakithi kukhanya angathi amapholisa enza okwehlukene lalokho abakhangelelwe ukuthi bakwenze.
Sokukanengi uzulu ekhala ngokuthi amapholisa yiwo azinkokheli zokona kuleli ngoba kubo bonke ubugwelegwele obenzakalayo elizweni amapholisa yiwo akhokhelayo, ikakhulu awemgwaqweni.
Lanxa izinto lezi bezikhulunywa nguzulu, ubufakazi bokuthi ngeqiniso sibili amapholisa azinkokheli zokona besingakaze sibubone.
Kumaviki ambalwa adluleyo kuphume udaba lwamapholisa amiswe emthethwandaba wakoBulawayo esetheswa icala lokudizisa emgwaqweni lapho okubikwa ukuba uwindi womtshova wahamba labacuphi emoteni abayibo abahle bazibonela ngawabo amehlo ubugwelegwele lobu busenzakala.
Kuyadanisa-ke ukuthi lanxa ilizwe lizama ukulwisana lobugwelegwele kukhanya sengathi amapholisa ayiwo okumele abophe abephula umthetho lawo ayawephula lowomthetho.
Kukanengi sisizwa abatshayeli bemitshova kukanti kwezinye izikhathi siyazibonela befumbathisa amapholisa imali ukuze badlule kuma-roadblock. Kambe kungaba lilizwe lapho okuthi umuntu olecala angavele afumbathise ipholisa kasabotshwa sezihambela nje samuntu ongelacala.
Umbiko owethulwe yisikhulumi samapholisa kuleli uSenior Assistant Commissioner Charity Charamba ngoMvulo othi abatshayeli kabasavunyelwa ukuphuma phakathi kwezimota nxa bangamiswa kuma-roadblock ulakho ukuphathisa ukuthi kwenqatshelwe ubugwelegwele emigwaqweni yakithi.
Lokhu kulinyathelo elihle njengoba nje lekhefu leKhisimusi selisondele njalo yiso futhi isikhathi lapho okwenzakala khona ingozi ezinengi emigwaqweni ngenxa yokuba abatshayeli bayabe behamba ngemota ezingafanelanga ukuba semgwaqweni bahamba nje bezidizela amapholisa, okucina kubangela ingozi emgwaqweni.
Kungumbono waleliphephandaba ukuthi nxa abatshayeli ngazo zonke izikhathi bekhuluma lamapholisa babe belalelwe yizihambi kungaphathisa ukuqeda ubugwelegwele bamapholisa akade esaziwa ngokuthathela abatshayeli amachence abo kanye lamakhiye ezimota.
Into exaka umuntu wonke okhangelele ukuvikelwa ngamapholisa yikuthi, nxa wona amapholisa esezaphenduka uthango adle amakhomane kambe inyamazana zona zizakwenzenjani.
Kambe kungaba yilizwe bani elokuthi umphakathi uzahlala ububula sikhathi sonke ngokonelwa ngamapholisa.
Sitshayela iziphathamandla ezikhangela amapholisa ihlombe ngokuhlolisisa kanye lokuhluzisisa ezikwenzileyo ukuze zithathe lelinyathelo ngoba kutshengisa ukuthi labo sebebonile ukuthi ngempela kukhona okutshaya amanzi ekuziphatheni kwabanye babo.
Lokhu kuzaphathisa njalo ukuthi ilizwe lethu njengamanye amazwe lihlonipheke.
Kungumbono kaMthunywa ukuthi uHulumende njengoba esengenele njalo wafaka eminye imithetho yemigwaqweni ngenhloso yokwenqabela ingozi ngesikhathi sekhefu akube lezinye iziphathamandla zamapholisa ezibhodayo emigwaqweni yonke yelizwe zihlola ukuze zibone ukuba umthetho lo omutsha uyalandelwa. Kuthi labo abatholakala bewephula kabamiswe umsebenzi ngoba yibo abangcolisa amapholisa akithi.
