uMthunywa
NguDkt Dennis Mlandelwa Sinyolo eloba eseBelgium
BAKWETHU, imfundo yezandla iqakathekile. Yiyo phela eyakha ilizwe iliphucule libe yibunkanyankanya lobu esibubona emazweni athuthukileyo.
Ngitsho phela yona iTVET (Technical and Vocational Education and Training). ITVET kumbe imisebenzi yezandla igoqela ukulima, ukubaza, ukwakha, ubukanika, ubunjinela lokunye okunengingi. Lanxa sisithi le yimisebenzi yezandla, nxa uwenza lumsebenzi kudingeka ukuthi usebenzise ubuchopho lenhliziyo.
Amazwe asempumalanga agoqela iMalaysia, South Korea, Singapore leChina athuthukiswa yikuqinisa imfundo, ikakhulu eyezandla. Yikho lamhlanje uthola ukuthi amaTshayina agcwele kuyo yonke indawo njalo yibo abakha inkundla zemidlalo, imigwaqo, injanji, amadamu lokunye okunenginengi kwele-Africa lakwamanye amazwe asathuthukayo.
Imisebenzi yezandla yiyo ephethe amafekithali ayiwo enza impahla eziphethe njalo ezithuthukisa ilizwe. Phela omanjinela labanye abasebenza imisebenzi yezandla yibo abacanda balungise imigwaqo, bakhe amabholoho lamadolobho. Izimota, indizamtshina, izikepe lezinye ezokuhamba zilungiswa ngabantu abalamano emisebenzi yezandla.
Emazweni amanengi asathuthukayo agoqela leli elakithi, nxa umuntu efundele umsebenzi wezadla ulakho njalo ukuziphandela yena losapho lwakhe. Nxa ulamano okwenza izinto ngezandla zakho ulakho ukuvula eyakho ibhizimisi, mhlawumbe ucine usuphumelele ukwedlula umqhatshwa osetikitini ehola kanye ngenyanga.
Into ehluphayo lapha kwelakithi lakwamanye amazwe e-Africa yikuthi imfundo yezandla iyeyiswa, kukanti kwamanye amazwe iyatatanyiswa. Wonke umntwana opasileyo ufisa ukwenza umsebenzi wehofisini etshaye isudu wabopha lontanjana; nxa engowesifazana umuntu uyabe efuna ukusebenza ecece waphelela waqhola inkiza waze watshaya labo-qwa. Lokhu okokuthi umuntu usebebenza etshaye ihovorosi kumbe ifasikoti abanye abafuni kuzwa ngakho.
Lapha kanenginengi umntwana ofundela umsebenzi wezandla ngongapasanga kuhle e-secondary, kumbe osuke waswela indawo eyunivesithi, kukanti kwamanye amazwe umntwana ufundela umsebenzi awuthandayo njalo elekhono lawo — phela uNkulunkulu wasidala wasipha iziphiwo ezitshiyeneyo. Abanye basuka bangaphumeleli empilweni ngoba umuntu esuke wangasebenzisi ikhono aliphiwa nguMdali.
Kumele UHulumende athathe amanyathelo okuguqula imibono yabantu ukuze babalulekise imisebenzi yezandla. Amakolitshi afundisa imisebenzi yezandla labaqeqetshi bawo kumele baqakathekiswe baphiwe zonke izikhali zokufundisa ukuze bahwatshe ingcitshi ezazi qho umsebenzi.
IZimbabwe ingabalulekisa imfundo yemisebenzi yezandla ilakho ukuthuthuka ifanane lawonala amazwe esiwababazayo ngapha ngaphetsheya. Kangitsho ukuthi imfundo yiyo yodwa ethuthukisa ilizwe; engikutshoyo yikuthi leli linyathelo lakuqala kuhambo lokuya eKhenani.
