uMthunywa
YiNtatheli kaMthunywa
UMONGAMELI uEmmerson Mnangagwa useqinisekise isizwe ukuba uHulumende uzaqala ngomnyaka ozayo ukuqhubekisela phambili uhlelo lwemfundo yamahala.
Kumbiko, omunyethwe ngokugcweleyo liphephandaba le-Sunday News kuliviki, uMongameli uthe uzaqinisekisa ukuthi imfundo ifinyeleleka kalula, njengoba izifundo seziphawulwa ebulenjini ngenxa yokuza kweCovid-19.
UMongameli uthe ukungalingani kwempilo lezomnotho kanye lendingeko yokulandela indlela zokufunda zakulezinsuku sokubangele ukuba labo abaswelayo basalele emuva okucina kubangela ukuba batshiye izifundo endleleni.
Lokhu uthe sekudale imbuzo mayelana lokutholakala lokubakhona kwezinto ezisetshenziswayo, ama-data, amagetsi, okwenze uHulumende wangenela ngecebo lokuthi kube khona konke ukuze imfundo yamabanga ePrimary ibe ngeyamahala ngomnyaka ozayo.
“Amagajethi asephenduke aba yingxenye ebalulekileyo kumfundi, kukanti kunzima ukuwathola; idatha iyadula; amagetsi ayahlupha.
Imuli ezinengi azenelisi ukuthenga ama-solar panel. Abafundi kufanele babhalise nsuku zonke emakilasini asebulenjini.
Ngakho-ke akumangalisi ukuthi sibhekane labanengi abafundi abatshiya izifundo,” kutsho uMongameli kumbiko wakhe.
Uthe uHulumende ukhathazekile ngalokho ngoba kubuyisela emuva intuthuko, okudinga izixazululo eziphuthumayo.
“Kusukela ngomnyaka ozayo, uHulumende uzaqhuba uhlelo lwezemfundo ngezigaba ehlose ukuthi kutholakale imfundo yamahala elizweni lonke.
Kufanele senze imfundo yamabanga aphansi ibe ngeyamahala futhi ifinyelele wonke umuntu wonke ngomnyaka ozayo, ngo-2023.
Lokhu kugoqela ukuba uHulumende abhadale indleko zemfundo zabafundi bonke ezikolo zamabanga aphansi.
“Kutsho ukuba uHulumende uzabhadala zonke indleko kuhlelo lolu olutsha lapho imitshina yakulezi insuku ebaluleke khona kwezemfundo.
Wonke umntwana ofunda esikolo se-primary kufanele abe le-tablet kodwa lokhu kube yindleko kaHulumende.
“Izikolo ze-primary zizakuba lamagetsi lezigxingi zamagagasi wokuxhuma ebulenjini. Lokhu kungumsebenzi omkhulu esingeke siwudlulisele phambili,” kutsho uMongameli Mnangagwa.
Uthe loba ukwabiwa kwengwalo ze-hard copy kuzaqhubeka, kulindwe ukuthi bacine besebenzisa ubulembu.
“Umhlahlandlela omutsha lo utsho ukuba zonke ingatsha zikaHulumende, zikhokhelwa lugatsha lwe-Finance and Economic Development, kumele zisekele ukuze kufezeke loluhlelo lwezemfundo kuhambisana lombono wethu we-Vision 2030.
Ngizahlola ingqubekela phambili ezikolo zasemakhaya ezisendaweni ezisemuva ukuze zibe lenguquko ebalulekileyo.”
