uMthunywa
YiNtatheli kaMthunywa
UMDLALO wokugijima ezikolo zesabelo seMatabeleland North usuphakeme nanko abaqeqetshi kulezizikolo babika ngokuzethemba ukuthi ithimu yabo yokugijima izenza ngcono lonyaka kumincintiswano yezabelo edolobheni leKwekwe ngeviki ezayo.
Kusukela kuminyaka elitshumi eyedluleyo, iMat north ihlala isehluleka ukuphumelela kuyo yonke imncintiswano yokugijima.
Isigaba okukhanya silethalenta kwezokugijima yiHwange. Isigaba seBinga silandele ngemendulo ezingamatshumi amabili lasithupha.
Iziqinti zeMatabeleland North ezibumba iqula labantwana elizancintisa eKwekwe zibalisa iBinga, Nkayi, Tsholotsho, uMguza, Hwange, Lupane leBubi.
IBubi lonyaka izamile ukwenza ngcono ngokwenyuka kunombolo yokucina. IMguza ibuyele ekhaya iphethe umphini ngemendulo eziyisitshiya galolunye.
Isigaba seBubi leMguza zihlala zisalele muva kwezemidlalo minyaka yonke. Isizatho kubikwa yikusilela kwempahla ephathisa ukulolonga abantwana kanye lokuswela ababalisi abalothando lolwazi lwezemidlalo.
Inhlanganiso yabaphathi bezikolo ze-primary iNational Primary Heads (iNaph), ibambene lenkampani yeNestle iqoqa umncintiswano yokugijima minyaka yonke ngethemu yakuqala.
Umgcinisihlalo weNaph esabelweni seMat North uCharles Ndiweni, uthe isabelo sakhe sizasebenza nzima sifuna ukubalekela inombolo yokucina kulimincintiswano.
“Sizenza ngcono eKwekwe. Lesi yisithembiso esivela ebantwaneni abazasigijimela. Sikhethe ithimu yabantwana abangu-65 abazagijima, kuthi abanye ngabazasimela kumncintiswano we-physical education.
“Ngilokuthaba ukubika ukuthi lonyaka isigaba seBubi senze ngcono kuleminyaka edluleyo. Lokho kusitshengise ukuba izikolo sezithathela phezulu umdlalo wokugijima. Labafundi sebekhwabitha ezemidlalo ngoba sebenanzelele ukuthi kuyaphileka ngazo.”
“Sikhangelele ukuthi ithimu ekhethiweyo le, iphakamise isabelo seMat North. Okusijabulisayo yikuthi abantwabethu labaqeqetshi babo sebelandela imithetho yokugijima,” kutsho uNdiweni.
UNdiweni ubonge kakhulu ukuphathisa kohlelo lwe-Nestle Healthy Kids ngoba soluguqule indlela izikolo eziphatha ngayo umdlalo wokugijima.
Uthe abantwana abanengi sebevuleke amehlo ngokuqakathekisa ithalenta lokugijima kanye lokukhuthalela ezempilakahle.
