uMthunywa
Tadiwa Nyatanga-Pfupa
INDLELA zonke eziqonda esikolo seRujeko Secondary eGlendale, eMazowe esabelweni seMashonaland Central ngoMgqibelo wamhlaka ziyabe zingalali nyoka nanko phela yikho lapho okuzagujwa khona usuku lweWorld Aids Day kuleli.
Isigaba lesi sikhethwe ukuthi kube yiso okuzagujelwa usuku lweWorld Aids Day ngoba inani lokumemetheka kwegcikwane leHIV liphezulu nge-18,6%.
Indikimba yalonyaka ithi: Yazi isimo sakho. Indikimba le ikhethwe ngemva kokunanzelela ukuthi igcikwane leHIV liqhubeka limemetheka.
Ngaphandle kokuxwayisa abantu ukuthi bazi izimo zabo zegcikwane leHIV, indikimba yalonyaka iqhelisiwe ukuze inengi labantu bahlolwe eminye imikhuhlane enjenge Tubercolosis (TB), izifo ezithelelwana emacansini (STIs) leminye nje imikhuhlane engathelelwanayo efana lemvukuzane.
Labo abalegcikwane leHIV kumele bazi iCD4 count yabo kanye lenani legcikwane emizimbeni yabo.
Ukwazi lokhu kuzenza iZimbabwe iphumelele ekufinyeleleni umgomo we-90 by 90 by 90 kusiya kumnyaka ka2020 kuqhubeka kusiya kumnyaka ka-2030 ukuze kube sekuqedwe ingculazi.
Ibanga le 90 by 90 by 90 lithi i90% yabantu abelegcikwane leHIV kumele babesehlelweni lokwelatshwa njalo i90% yalabo abasehlelweni kumele inani legcikwane emzimbeni lehliswe.
AbeNational Aids Council (Nac) lezinye inhlanganiso ezisebenzelana layo ekulwiseni igcikwane leHIV baqhubeka bekhankasa ngokuqiniswa kwendlela zokuvikela igcikwane ezigoqela ukuhlolwa kanye lokwelulekwa, ukusokwa kwabesilisa, ukuvikela ukuthelelwana kwegcikwane lisuka kumama lisiya emntwaneni, uhlelo lokwelatshwa igcikwane leHIV, ukuqeda ubandlululo, ukuqeda ukuhlukunyezwa kwabesifazane labesilisa, ukusetshenziswa kwamakhondomu phakathi kwezinye indlela.
EAfrica yonke, iZimbabwe njengelizwe labeNac njengenhlanganiso eqondisa inhlelo zokuvikela igcikwane basebenza ndawonye ukuvuselela indlela zokuvikela igcikwane leHIV kanye lokuqeda iHIV kusiyafika umnyaka ka2030.
Amalungiselelo osuku lolu asekuzinga eliphezulu. Amalunga kanye labancedisayo kuloluhlelo sebelungisile inhlelo zabo abazazinika uzulu mayelana ngegcikwane leHIV kanye lengculazi.
UProvincial Manager weNac esabelweni seMashonaland Central uMnumzana David Nyamurera uveze ithemba lesikhumbuzo esikhulu.
“Okwakhathesi sesamukele usekelo olukhulu kumalunga wonke esabelweni kanye lemazweni. Ngakho sisafaka isicelo sosekelo lwemali kumankampani amakhulu,. Sifisa basincedise langokunye abalakho ukuze senze ilanga leli libe lilanga elizahlala likhunjulwa. Ngilethemba lokuthi ilanga leli lizaba lempumela enhle,” kuchaza uMnu Nyamurera.
Uqhubekele phambili enxusa uzulu wonke jikelele eZimbabwe ukuthi abuye.
“Umuntu wonke ukhululekile ukuthi abuye azoxhasa kusikhumbuzo lesi. Inhlelo zohambo zizakhulunywa ngokuhamba kwensuku,” kuchaza uMnu Nyamurera.
Esabelweni seMashonaland kucatshangelwa ukuthi kulabantu abangu-99 000 abaphila legcikwane leli njalo kulabantu abafika i2940 ababa legcikwane leli ngomnyaka.
Umcimbi weWorld Aids Day kuleli wenziwa ezabelweni ezehlukeneyo umnyaka ngomnyaka. Isabelo sakoBulawayo yiso esasiphethe umcimbi womnyaka ka2017 kwathi ngomnyaka ka2016 wasusiya eKwekwe esabelweni seNkabazwe kuthi isabelo seMashonaland sicine ukuphatha lumcimbi kuminyaka elitshumi eyedluleyo.
Isikhumbuzo sokulayithwa kwamakhandlela (candlelight memorial) kanye lenhlelo zokuvikela igcikwane leHIV ngezinye izinto ezenziwa ngeWorld Aids Day ka2018.
Kumhlaba wonke jikelele, iWorld Aids Day yenziwa mhlaka 1 Mpalakazi minyaka yonke njalo ilithuba lokuthi abantu elizweni lonke babambane ekulwiseni igcikwane leHIV, batshengise usekelo ebantwini abaphila legcikwane leli njalo bakhumbule abasitshiyayo bebulawa yingculazi.
