uMthunywa
Cornelius Luphahla
KULANDELA indaba kasobhuku wesigabeni seMathetshaneni eTsholotsho eyokugcina itombstone ayikhiphe ethuneni lomntanakhe ethi izatshontshwa qede kwaphela abantu emulini yakwabo, uMthunywa uhluzise kabanzi ngale indaba wathola ukuthi yinto engenzakala.
Usobhuku uMnumzana Jarada Ncube wayeselenyanga eziyisitshiyagalo mbili (8) egcine ilitshe lengcwaba leli alikhipha engcwabeni lomntanakhe kwasekuqala ukufa abantu abedlula 10 ngalesosikhathi okwenza abantu bacabangela ukuthi yilo ebeliqeda umdeni.
UMnu Ncube ebuzwa ngale indaba wavuma ukuthi abomdeni bafa kakhulu ethi ubengakwazi ukuthi baqedwa lilitshe leli.
“Kuliqiniso ukuthi kwabhubha umntanami sakhipha ilitshe lengcwaba ethuneni salifaka endlini yami ngoba sisesaba ukuthi abantu bazalitshontsha. Ngemva kwalokho salibisela salakhela ngesamende ukuthi lingatshontsheki.
“Engingakwaziyo yikuthi abantu babeqedwa yikugcina ilitshe leli endlini kumbe babezifela kuphela,” kutsho uMnu Ncube.
UMthunywa ukhulumisane lomunye wezinyanga ezidumileyo uMnumzana Samson Sibanda waveza ukuthi lokhu okwenziwa nguMnu Moyo kuyazila njalo kulakho ukuletha uzimu egumeni.“Khona ngokwesiko kuyazila ukuthi ukhiphe ilitshe engcwabeni ulilethe ekhaya ngoba ungahlanekelwa ngabaphansi. Ekuhlanekelweni ngabaphansi lapha ungehlelwa yingozi ethile kumbe kwenzeke esinye isiga emdenini wakho yikho nje umuntu engcwatshwa ngaphandle komuzi.
“Ngalokhu nxa kubhubhe abomdeni ngemva kokugcina kwakho ilitshe lengcwaba endlini kufanele uhlahlule uzwe ukuthi yini engabe idale ukuphela kwabantu. Lapha ke kuyabe kufanele ugezise umuzi ngoba kungabe kuthulienje ukuphela kwabantu kodwa besazoqhubeka ngoba ithunzi liyabe lilokhe likhona,” kuphetha uMnu Sibanda.