uMthunywa
IZIMBABWE United Passenger Company (Zupco) isikhweze imali yokugada amabhasi emadolobheni ithi indleko zokuhambisa amabhasi ziya zikhuphuka kusa kwamalanga.
Imali zokugada ezintsha ziqala ukusebenza lamuhla (oLwesine) okuzakutsho ukuthi abanye abantu bazakube sebebhadala imali eziphindwe kabili. Kungxoxo lentatheli, umaqhuzu weZupco uMnumzana Evaristo Madangwa uthe imali ezintsha zokugada ziyindlela yokunciphisa indleko.
“Indleko zokusebenza eziphezulu kanye lokukhuphuka kwentengo okwenzakala elizweni kwenze sakhuphula imali zokugada ukuze sibelesiqiniseko sokuthi inkampani yethu yenza ngcono ekuthwaleni abantu. Uzulu kumele azi ukuthi asihlali sikhuphula imali zokugada sonke isikhathi, kodwa senza lokhu ngemva kwesikhathi eside,” kutsho uMnu Madangwa.
Ngokutsho kwesitatimende esiphumileyo, abagadi sebezabhadala i$60 ngalunye uhambo kuboZupco isuka ku-$30 kukanti amakombi asebiza i$80 ekhwele isuka ku-$50 okomango osuka ku-0 kusiya ku-20 kilometres, labo abahamba umango ongange-20 kusiya ku-30 kilometres bazabhadala i$90 kuhambo lunye emabhasini kaZupco kuthi abagada amakhombi babhadale $120, kumango ongange-31 kusiya ku-40 kilometres amabhasi kaZupco azababhadalisa $110 ekhwele isuka ku-$ 60.
Imithetho yelockdown ithi amabhasi lamakhombi eZupco yiwo wodwa avunyelwa ukuthwala uzulu emadolobheni. Inkampani yeZupco ilamabhasi angaba yi-500 kanye lamakhombi ahamba imango yakoBulawayo kuphela.
