uMthunywa
Nkosilathi Sibanda
UMQEQETSHI wesizwe kumdlalo wokugijima uPhakamile Lisimati uthe akulanto engaphazamisa ukuthi baphenduke belemendulo yegolide kumncintiswano wama-Olympics alonyaka.
IZimbabwe igijinyelwa nguNgoni Makusha yedwa kulumncintiswano wamazwe ozaqhutshwa edolobheni leTokyo eJapan kusukela mhlaka 23 kusiyafika umhlaka 8 kuNcwabakazi.
UMakusha ugijima umango we-100m le200m. Ngokwakuqala umgijimi lo ephiwa ithuba lokuthi ayemela isizwe kusibanga somncintiswano esinjengama Olympics.
Umqeqetshi wakhe uLisimati uthe ukuchinsa kwalumdlali kunkundla zama-Olympics akutsho ukuba abasoke bayithola imendulo.
“Njengabo bonke abazancintisa, silolonge saphelela sithembele ukuthi uNgoni asondelele imendulo. Igolide siyalifuna. Kudibene intshantshu la njalo lathi sibalelwa kuzo,” kutsho uLisimati ekhuluma lentatheli yephephandaba likazulu ese-Tokyo ngoLwesibili.
Imidlalo yama-Olympics yayihlelwe ngomnyaka odluleyo kodwa yedluliselwa phambili kulandela ukuqhamuka kwegcikwane leCoronavirus.
Abanye abadlali ababumbe iqembu lesizwe kuma-Olympic babalisa uDonata Katai loPeter Wetzlar abomdlalo we-swimming. Kumdlalo we-rowing kukhethwe uPeter Purcell-Gilpin, uScott Vincent abazadlala igolf. — @NkosieLegend
