uMthunywa
YiNtatheli kaMthunywa
AMALOKITSHI wonke asedolobheni lakoBulawayo azabe engelamanzi okwensuku ezintathu kusukela ngoMvulo kusiya ngoLwesithathu nanko kukhangelelwe ukuthi kube kulungiswa okuphathelane lamagetsi okuzaphambanisa ukupotshwa kwamanzi eNcema lase Fernhill eza koBulawayo.
Kubikwa emafekithali kunye laphakathi edolobheni amanzi azaqhubeka ephuma ezimpompini.
UMabhalane wedolobho lakoBulawayo uMnumzana Christopher Dube uthe ukuvalwa kwamanzi kumisiwe kusukela lamuhla (18 Mbimbitho 2024) kuze kuqaliswe ukusetshezwa.
“Ukuze sivikele impompi zethu ukuthi zingaphambaniseki ikhansili yedolobho lakoBulawayo izaphambuka kancane kuhlelo lokuvalwa kwamanzi obeselujwayelekile kusukela ngoMvulo mhlaka 18 kusiya ngoLwesibili mhlaka 19, kuzaze kuyevulwa ngoLwesithathu mhlaka 20 kuyonale inyanga,” kutsho uMnu Dube.
Ukhuthaze uzulu ukuthi alondoloze amanzi.
“Sithanda ukuxolisa kuzulu wakoBulawayo ngalokhu ukuvalwa kwamanzi. Amanzi yimpilo. Asiwalondolozeni,” kuphetha uMnumzana Dube