uMthunywa
YiNtatheli kaMthunywa
ZISELE zimadolonzima izakhamizi ebezibuthene esililweni selinye ikhehla leDianaspool eSigodini kulandela ukuba umzukulu walo efikelwe lidlozi emngcwabeni waveza ukuthi nguye oseqede amalunga emuli yakhe ewabulala, uMthunywa ukuzwile lokhu.
Isiga lesi senzakale ngoMvulo kuviki ephelileyo lapho uMnumzana Alfred Nhliziyo afikelwe khona ngumoya lo waveza ukuthi uyaloya njalo useqede amalunga emdenini wakhe.
UMthunywa ukhulumisane lesinye isakhamuzi esasisemngcwabeni lo uNhliziyo echaza insindabaphenduli le, saveza ukuthi lokhu kubatshwaqisa umzimba.
UMnumzana Mziwethu Ncube uthe uNhliziyo wabethusa kakhulu ngokuchaza amalunga emuli yakibo asebafayo esithi nguye owabangela ukuthi bafe.
“Besisemngcwabeni kayise omkhulu kwathi sokuyisikhathi sokuthi kukhulekwe umsebenzi ungakaqali sabona uAlfred sekhuluma indaba ezinzima kakhulu. UNhliziyo ngesikhathi kukhulekwa wafikelwa ngamadlozi waqala ukuchaza ngobuthakathi bakhe abenza emulini yangakibo.
“Okusimangalisileyo yindaba yokuthi ubalise amalunga emuli yakhe, amanye abhubha besesengabantwana, lalo obhubhileyo nguye ombuleleyo,” kuchasisa uMnu Ncube.
UMnu Ncube uqhubekele phambili wathi okwabethusa kakhulu yindaba yokuthi usebenzisa igazi labantu laba njalo uziphilisa ngalo.
“Okunye okuvezwe nguNhliziyo yikuthi nguye ovimba ukuphumelela emulini yakibo njalo akula muntu ozaphumelela nxa yena engakaphumeleli,” kuchaza uMnu Ncube.
UMthunywa ukhulumisane lodadewabo kaAlfred, uNkosazana Clara Nhliziyo othe kuliqiniso ukuthi emulini yangakibo abantu bafa ngendlela engaqondakaliyo njalo akulamuntu ophumelelayo loba kutheni.
Akukhulumayo siyakukholwa ngoba izinto azisihambeli empilweni zethu.
“Inkulumo kabhudi isidale ukungazwanani phakathi kwemuli kanye lezihlobo ngoba khathesi asisakhulumisani ngendaba eyakhulunywa ngubhudi emngcwabeni.
“Khathesi siyimuli sesigconwa ngendaba le sokuthiwa yithi esiloyayo, izihlobo kanye labantu esigabeni kabasasikhulumisi,” kuchaza uClara.
Usobhuku wakule indawo uMnumzana Mehleli Nyoni uthe indaba le uyizwile kodwa kasoze akhulume kabanzi ngayo ngoba ingeyomdeni wakoNhliziyo. Nxa bona sokubehlule ukuzwisisana yena yikho azangena khona.
“Udaba lwemuli yakoNhliziyo lwafika endlebeni zami kodwa ngoba luthinta imuli angisoze ngilithonise, bazaluxazulula bebodwa kuthi nxa sebehlulene ukukhulumisana sengizabancedisa,” kuchaza uSobhuku Nyoni.
Imizamo yokukhulumisana loMnu Nhliziyo yehlule ngoba kuthiwa sowabaleka ekhaya njalo akwaziwa ukuthi wayangaphi.
