uMthunywa
Ethel Ncube
KULENINA leMagwegwe North koBulawayo elisele lifisa ukuginywa ngumhlaba kulandela ukubanjwa komlayezo ebeliwuthumezele itshamali lithi kabazoncinda uluju lwemvelo.
Abasiki bebunda baveze ukuthi uNation Mawere uthethe imitshaqana yakhe ngemva kokufumana umlayezo lo kuWhatsApp kaNobuhle Nkiwane ebiza enye indoda ukuthi izolala laye emzini wabo.
Ekhuluma loMthunywa uNkosikazi Siboniso Ncube oyisakhamuzi uveze ukuthi indoda ibisikhathele ngomfazi lo oyijolelayo.
“Kuhle ngoba seze wambamba ngezakhe izandla uMawere. Uthuthile endlini yakhe ngoba umkakhe uyamdelela kamhloniphi, engaletha itshamali endlini yabo. Bekubuhlungu ukubona indoda endala isenziwa isiphukuphuku egcekeni.
“UMaNkiwane ubetshiya indoda isale igcine abantwana alale engekho engazakali ukuthi uyengaphi,” kutsho uNkszn Ncube.
Iphephandaba likazulu lizwe ukuba uMnu Mawere ubehlala ehluphana lomkakhe bebanga ukuthi uMaNkiwane kayihloniphi indoda yakhe.
Intatheli ixhumane lomunye oziveze ngokuthi nguMaDube nje kuphela obike ukuba kuliqiniso ukuthi uMawere wathutha watshiya umfazi.
“Indoda yazithwalela impahla ngokuthula yatshiya kwakhiwe ngoba isikhathele ngomfazi otshiya indoda endlini ayejola. Mina angilakho okunengi engingakubikela khona kodwa okukhona yikuthi umfazi lo uyaletha amanye amadoda athandana lawo umkakhe engekho endlini yakhe emini litshisa ligwaze umhlaba, yikuthi nje abantu bayesaba ukuyikhuluma indaba yakhona,” kulandisa uNkszn Dube.
UMthunywa ukhulumisane lalowo okucatshangelwa ukuthi uyajola uNkosazana Nkiwane oveze ukuthi kuliqiniso ukuthi indoda seyathutha.
“Umkami wathutha wangitshiya labantwana ababili, isikhathi sokumdinga mina kangilaso ngathula kuphela ngimthola sehambile. Ngathi ngingakayi eGoli wangitshaya ethi ngiyangaphi mina ngahamba ngisiyathengela abantwana impahla ngathi ngiphenduka wathwala impahla zami ezathengwa ngeyami imali.
“Mina bengimgcinile lapha engasebenzi esebenza ukuthwala ibhara esiya emsikeni kuyimi engithengisayo yena uthe esesuka wathatha le$1 500 le 1 000 Pula yami,” kutsho uNkszn Nkiwane.
Ekhuluma lentatheli ngendaba yokuthi yindaba engabophisi umkakhe njengoba ehambe lemali yabantwana uMaNkiwane uthe amapholisa akhatshana kakhulu lalapha ahlala khona.
“Emapholiseni kukhatshana lalapho engihlala khona njalo ukutshona sengigida khonale ngeke ngikwanise. Abantu bayakhuluma abakufunayo mina angilamuntu engithandana laye lokho ngikuzwa ngani ukuthi ngabanjwa ukuthi ngiletha itshamali endlini,” kutsho uNkszn Nkiwane
UMthunywa uxhumane loMnumzana Mawere ovumileyo ukuthi yena uthuthile ngoba umkakhe emkhathaza
“Mina ngithwale ezami impahla ngatshiya umfazi lowana ungifake ihlazo ngezenzo zakhe. Uyajola, alale engekho endlini nxa ngimkhuza ungitshela ukuthi umzimba ngowakhe lami sengibeke izikhali phansi ngatshiyana laye.
“Ngabamba imilayezo efonini yakhe kuWhatsapp ebhalwe nguye ebhalela enye indoda eyayimi kanje.
‘Ubuye uzongikhwe.. endlini yami indoda yami kayikho iyaphuza ukutshayisa emsebenzini.’
Kambe okunjalo ngangingakumela mina bengimthanda ngenhliziyo yami yonke kodwa ubutshapha bakhe bungephule umoya.
Ukuthi ngasuka lemali ngamanga uyayithatha ngaphi yonke leyi engasebenzi. Ukuthandana laye kufana lokulima inyawuthi uyadinwa ngokutshona usethusa inyoni ezingapheliyo okungcono yikutshiya. Ngizihambele mina, angizange ngimbeke isandla kumbe ukumthethisa,” kuphetha uMnu Mawere.
