uMthunywa
Nobuhle Mgwaqo
Izibhedlela zeCorporate 24 ziqhuba umkhankaso wokwelapha abantu abehlelwe zingozi ezehlukeneyo mahala koBulawayo kunye leHarare kumkhankaso obizwa ngokuthi yi-Emergency Preparedness Campaign.
Umkhankaso lo uvulwe ngokusemthethweni mhlaka 8 Nhlolanja emawofisini abo njalo uzaqhutshwa inyanga yonale yonke. Esibhedlela sakoBulawayo kuzamukelwa abantu abakuzimo eziphuthumayo bakoBulawayo, abavela esabelweni seMatabeleland North kunye leMatabeleland South.
Kubikwa uhlelo lolu luza ngemva kokunanzelela ukukhuphuka kwenani labantu ababa kuzimo eziphuthumayo elizweni njalo izikhathi ezinengi abayabe bengakulungelanga engqondweni kunye langemali.
Bonke abehlelwa zingozi ezehlukeneyo kungaba ngeyomgwaqo, eyemsebenzini kumbe kube ngumuntu osengozini yokulahlekelwa yimpilo bazahlolwa belatshwe mahala esibhedlela seCorporate 24 inqobo befike esibhedlela bethwelwe yi-ambulensi ngaphansi komkhankaso we-Emergency Preparedness Campaign.
Kubikwa umuntu ozafika esesimeni esiphuthumayo futhi esimenza abe sengozini yokulahlekelwa yimpilo uzahlolwa, enziwe konke okudingakalayo aze aphume engozini yokufa mahala.
Inhloko yayo yonke imisebenzi yezokwelapha esibhedlela seCorporate 24 koBulawayo, uChief Medical Officer uDokotela Kevin Kusano uthe umkhankaso lo uzancedisa abantu abasengozini yokulahlekelwa yimpilo.
“Sizabe sisamukela abantu abasengozini yokulahlekelwa yimpilo kungelambadalo. Laba ngabantu okungenzeka bafe nxa bengaselatshwanga masinya.
“Izehlakalo eziphuthumayo zigoqela ukwehluleka ukuphefumula, umuntu owopha okwedlulisileyo okuphambanisa ukugijima kwegazi emzimbeni kunye lomuntu oselahlekelwe yikwazi engabe equlekile,” kuchasisa uDkt Kusano.
Uthe nxa kudingeka ama–tests, x-ray, amafluids kunye lamajekiseni uzawanikwa kungelambadalo aze abe sesimeni esiphephileyo.
“Abantu abanengi nxa bangafikelwa yizimo eziphuthumayo bayadideka bangazi ukuthi baqonde ngaphi. Lokhu kwenza ukuthi ukuqondiswa kwesimo kuphuze. Yikho okusenze sathi kuyadingeka ukuba sincedise abantu sibabele ulwazi ngezimo eziphuthumayo abangabhekana lazo, kungaba semakhaya abo.
“Sananzelela ukuthi abantu bangehlelwa yingozi ikakhulu abalimeleyo kabaphathwa ngendlela. Lapha sitsho ukuba umuntu kungenzeka abe elimele emgogodleni, abantu abaqala ukufika bayamthwala bamngenise emoteni bamgijimisele esibhedlela esiseduzane kodwa uhlupho yikuthi kungenzeka bangambambi ngendlela.
“Ukulimala okungatsho lutho kungacina sokuyinkimbinkimbi kumbe sekukubi sekubeka umuntu engozini yokulahlekelwa yimpilo, ngokunjalo sidinga ukuthi sifundise uzulu ngokuqakatheka kokuthi kungani kumele sisebenzise izimota ezithwala izigulane ama-ambulensi ngoba bayakwazi ukuphatha abantu lokuthi abantu baqonde labo ngaphi,” kulandisa uDkt Kusano.
Uthe njengesibhedlela ke ngenyanga le bazabe besamukela izigulane ezifika ngama-ambulensi bazelaphe zize zibe kusimo esiphephileyo.
“Sizabe sisamukela senze konke okudingakalayo umuntu aze aphume engozini kodwa nxa sekufuneka uchwepheshe (specialist) loba sokumele ulaliswe esibhedlela kuyabe sekumele ubhadale kodwa uyabe ukhululekile ukutsho lapho ofuna ukusiwa khona.
UMnumzana Vusi Moyo onguMphathi wokumaketha eCorporate 24 echasisa ngomkhankaso we-Emergency Preparedness Campaign uthe umkhankaso lo ugxile ekunikezeni ulwazi izikolo, amankampani kunye lomphakathi jikelele.
“Umkhankaso lo ugxile ekuthini umphakathi ulungele izimo eziphuthumayo okungasindisa impilo kubuye kwehlise lendleko zesibhedlela.
“Isibhedlela sizabe siqhuba izifundo ngosizo oluphuthumayo lwakuqala iFirst Aid kunye lezifundo Ngezempilo ezimeni eziphuthumayo emphakathini (Health Education on Emergencies) mahala.
“Uhlelo lolu luqondiswe koBulawayo leHarare lapho iCorporate 24 elezibhedlela khona,” kutsho uMnu Moyo.
Uhlelo lolu lwenziwa ngokubambisana labezimo eziphuthumayo abama-ambulensi abalisa iMars, Ace, Netstar, St Johns, Emras kunye laweBulawayo City Council.
