uMthunywa
Nkosilathi Sibanda
UMANGOYE engabe elala eziko emizini yabadlali beBulawayo Chiefs kodwa kubikwa lokhu akusoze kubaphazamise kumdlalo wabo leHerentals kunkezo yeChibuku Super ngoba ukunqoba umdlalo lo yikho okuzaqeda udubo lwabo.
Sebeqede inyanga ezine bengaholi, kungela ngitsho mali engena esikhwameni.
Amakhosi Amahle anxusa “abafundi” enkundleni yeBarbourfields kumdlalo wokucina wenkezo ngeSonto. Bazangena enkundleni bekhotha ingqweqwe zomlomo bethembele ekuthini bazathola iholo labo kumvuzo ezaphiwa kulumdlalo.
Nilton Terroso
Abadlali baleliqembu kunsuku ezisanda kwedlula bebebophe iqhinga lokukhalala lumdlalo.Ukuze bavume ukudlala, kubikwa bathenjiswe ukuthi bazabhadalwa iholo ngemali yomvuzo walinkezo.
Intatheli yephephandaba likazulu iphethe udletshana lokuthi inkokheli zeChiefs ngoMvulo zixoxisane labadlali lapho okuvunyelwane lokhu.
Kubikwa inkokheli zeqembu zithe kumvuzo wemali yenkezo, abadlali bazabelana isilinganiso samatshumi ayisikhombisa.
Ukunqoba iHerentals kutsho ukuba imali yabo izabe iphezulu.
Isivumelwano lesi kuzwakale ukuba siyimfihlo. Inhlanganiso yeFootball Union of Zimbabwe (Fuz) lePremier Soccer League ziluphethe udaba.
Premier Soccer League
“Yikho sibili. Kulecebo lokuthi kubhadalwe imali zabafana ngemali le ezathokala kumdlalo weChibuku Super,” kutsho umfakazi osebenza kuBulawayo Chiefs, owesabe ukuqanjwa.
“Loba benganqotshwa bazayithola imali yabo. Kusehlelweni ukuthi lokho okuzaphuma kumvuzo wokudlala kulinkezo kuzaphiwa abadlali. Kuhlelwe ukuthi abadlali bathathe i-70 percent.”
Intshantshu zenkezo zithola iUS$75 000, ezadliwa izaphiwa iUS$50 000.
Isikhulumi seChiefs uThulani “Javas” Sibanda utshele intatheli kaMthunywa ukuba konke sekulungile.
“Le yindaba esayikhuluma kudala. Okwakhathesi sesilinde ukuthi siyedlala sinqobe. Yikho kuphela,” kutsho uSibanda.
Thulani Sibanda
Kusenjalo, amalungiselelo aleliqembu aqhube kakuhle ngokutsho komsekeli kamqeqetshi uThulani Sibanda.
Umqeqetshi omkhulu weChiefs uNilton Terroso kubikwa uzathi ukuncedisa omunye wakhe ngamacebo kulumdlalo obaluleke kakhulu kumbali yaleliqembu.
IChiefs, eyangena kuPSL ngesizini ka-2018, iyachinsa ukufinyelela umdlalo wokucina wenkezo enkulu njengale. IHerentals layo iza koBulawayo ilande ukuzokwakha imbali kunguqu kakuleli.
Ezanqoba ithola itikiti lokuyamela ilizwe kumqhudelwano weCaf Champions League.
