uMthunywa
YiNtatheli kaMthunywa
IKHETHWA ematholeni!
Abalandeli beqembu lenguqu elidala kulawo wonke, iHighlanders bajabule ngokuzwa ukuba sebelomaqhuzu omutsha.
NgoLwesibili ekuseni imuli yabathandi labalandeli bezomdlalo bavukele ukuzwa ukuba uRonald Moyo usekhethwe ukuba aphathe ihofisi enkulu eka-Chief Executive Officer.
Lokhu kuza ngemva kwesikhathi iBosso ingelamaqhuzu kulandela ukusuka kukaNhlanhla Bahlangene Dube ngomnyaka odluleyo.
UMoyo, oleminyaka engu-32 yokuzalwa, wenze imbali ngokuba ngumaqhuzu omncane kulabo bonke kwezenguqu.
Iphephandaba likazulu likhulume lomaqhuzu omutsha lo ngoLwesithathu ntambama, obike ukuba inde indima azayincenta eqenjini.
“Ngiyathokoza ngethuba engiliphiweyo.
Lokhu akutsho ukuba kuphakame mina ngedwa, kuyisiqalo sokusebenza sisonke eqenjini.
Sizasebenza gadalala ukuze siphakamise iqembu lethu leHighlanders,” kutsho uMoyo.
Kubalandeli beHighlanders, umthwalo obhekane loMoyo umkhulu njalo ufuna abancedisi.
UPatrick Mpofu ongumlandeli weBosso wamukele ukuqhatshwa kukaMoyo wathi akula omunye obefanele lumsebenzi.
“Okwamanje iHighlanders kumele iqhubekele phambili isibangumzekeliso kwamanye amaqembu.
Ukubeka uMoyo esikhundleni siyazi ukuthi kuzahlupha abanye, kodwa vele bebefuna kungene ubani?
“Ngingazi ukuthi ukhona yini obengancintisana lojaha kodwa engikwaziyo yikuthi iHighlanders yenze into enhle.”
UBigboy “Mawiza” Nare osekela ibhola eseSouth Africa uthe uMoyo uzakuba yinsika yokuvuselela ithalenta labadlali.
“IBosso isizaqala ukunqoba okuzwayo.
UMoyo uyintanga yabo abadlali, loba engu-CEO, abafana bazakubona ukuthi iqembu liphethwe ngomunye wabo. Sesidiniwe ngabantu abadala,” kutsho umlandeli lo.
Injabulo ngoMoyo isidale ukuthi abalandeli laba bekubone ukuthi nxa abadlali bengakhweza amasokisi, inkezo yeligi ingaphenduka eBarbourfields.
UThabo “Gundu” Dube uthe umsebenzi omqoka kuMoyo yikwenza iHighlanders ibeliqembu elikhokhelwa njengebhizimusi.
“Zinengi indawo okumele azilungisise.
uJoel Luphahla
Sikhangelele ukuthi iqembu libe yibhizimusi, hatshi ukukhokhelwa njengeqembu elincinyane.
“Siyamhalalisela okaMoyo, simfisela konke okuhle ehofisini entsha.
Ukungena kwakhe kuzaletha amabhizimusi eduzane lethimu,” kutsho uDube
UDube, oseleminyaka esekela iBosso, usebikele uMoyo ukuthi ananzelele ukuthi kumele alungise udaba lwamaqembu aphansi kuma-juniors.
Uthe ukuvuselela amaqembu la kuzenza kubelula ukuthi iHighlanders ilolonge iphinde igcine abadlali.
UMoyo, owayeyisikhulumi seqembu, ubeke wabamba isikhundla sikamaqhuzu okwenyanga ezithile.
Kuthe ngemva kokuba iHighlanders ibike ukuthi idinga umuntu ozaqhatshwa kulihofisi, uMoyo ubengomunye wabaphosele incwadi zabo befuna lumsebenzi.
Kungumbono wenengi labalandeli laba ukuthi umaqhuzu omutsha lo uzaletha inguquko.
Unobhala weqembu uMorgen “Gazza” Dube uxwayise abasekeli lamalunga eHighlanders ukuthi ahloniphe isinqumo esithethwe zinkokheli ngokuqhatsha uMoyo.
“Ngemva kokudinga isikhathi eside, sesize sathola umuntu ozakuba ngu-CEO.
“Ngakho-ke ngithatha leli thuba ukucela usekelo lwenu olungathandabuzwayo kuleliqembu ngokuvuma isinqumo mayelana ngalokho.
URonald Moyo usekhethiwe njengomaqhuzu weqembu leHighlanders Football Club.
Uzoqala ngokusemthethweni ehofisini mhlaka-1 Mabasa 2022,” kutsho umbiko kaDube.
Unobhala lo ugcwalisise ngokuthi “Ikhethwa ematholeni”.
