uMthunywa
YiNtatheli kaMthunywa
ABASEKELI beqembu leCaps United koBulawayo sebeveze ukuthi bazakholisa ngeSonto nxa iqembu labo linganqoba iHighlanders.
IMakepekepe inxusa iTshilamoya ngeSonto enkundleni yeNational Sports kumdlalo weligi yeCastle Lager. Lo kuzabe kungumdlalo wesithathu iBosso iqeqetshwa nguAmin Soma-Phiri.
Amehlo azakuthi nhlo njalo kulumqeqetshi kudingisiswa ukuthi usetshintsheni kulithimu lokhe wathathela phezulu ngemva kokusuka kukaBongani Mafu.
Njengoba umdlalo weHighlanders weviki edluleyo ungazange uthabise umqeqetshi omutsha lo, abadlali basaselomthwalo onzima.
Ababukela umdlalo walithimu idlala leFlame Lily eMagumeni ngeviki ephelileyo bazavumelana ukuthi kukhona okutshaya amanzi ngomdlalo weHighlanders.
UMthunywa ungene ezitaladeni zakoBulawayo lasebulenjini bethimu yeCaps United okucacise ukuthi ngempela abalandeli be-Green Machine sebeyidelela iHighlanders.
UPersevere Gumbo olilunga labasekeli beCaps United koBulawayo ubike ukuthi balethemba lokuthi iqembu labo lizanqoba liyangise iHighlanders njengalokhu elikwenze amanye amathimu iqeqetshwa nguLloyd Chitembwe.
“Sikhangelele ukuyitshaya iBosso. Thina njengabalandeli esizakwenza yikukhuza ithimu kuze umdlalo uze uphele. Badanile abadlali balithimu ngakho kumele lathi sibaphinde futhi.
“Ayisimi ngedwa engibona kanje. Mhlawumbe bakhona lakuHighlanders abaziyo ukuthi akusimdlalo omncinyane abawulanda kuCaps United.”
UPatrick Nyambo omunye wabasekeli bakoNtuthu laye uthe: “Ithimu yethu layo kumele iqale ukutshengisa ukuthi iyafuna ukubayintshantshu. Kungenzeka siyinqobe iHighlanders, siphinde sinqobe lakweminye imidlalo elandelayo.”
Phezulu kwalokhu, abasekeli laba sebezimisele ukusekela umqeqetshi wabo uChitembwe kanye lomgcinisihlalo uTwine Phiri.
“Thina njengebhodi ekhangele abasekeli beqembu leli siyajabula ngomsebenzi oqhutshwa zinkokheli zethu. Ubukhokheli babo buqakathekile ukuze iqembu liphumelele,” kutsho uGumbo.
Ubike njalo ukuba abalandeli labo kumele bafunde kubukhokheli bukaPhiri.
“Sithanda ukubonga labanye abasekeli beqembu lethu ezweni lonke jikelele.”
