uMthunywa
Nkosilathi Sibanda
IQEMBU le-Highlanders selinikeze abalandeli balo induduzo yokuqeda umnyaka lo kakuhle nanko izikipa zayo ezintsha sezitholakala.
Kubikwa kusiyafika ilanga leKhisimusi, abalandeli beBosso koBulawayo bazenelisa ukuthi bathenge izikipa lezi ezitolo. Okwakhathesi zitholakala eHarare.
IBosso isilempahla entsha ethungwe yinkampani ebizwa ngokuthi yi-On the Ball (OTB). Inkampani le yiyo ethunge lezikipa ezintsha zeqembu leDynamos.
Ukutholakala kwezikipa zeHighlanders kukhangelelwe ukuthi kube zindaba ezinhle kubo bonke abalandeli bayo ngesikhathi beqeda umnyaka bengazange bayibone enkundleni.
Umgcinisihlalo uKenneth Mhlophe uthe loba kube ngumnyaka ongemuhle, abalandeli abathole injabulo ngokungena iKhisimusi lomnyaka omutsha begqoke impahla yeqembu.
UMhlophe utsho kanje kulandela ukubika kwenkampani ethunge lezi impahla ukuba izikipa zizagcwaliswa kuzitolo zonke ezaziwa ngokuthengisa impahla yohlonzi.
“Abasekeli beqembu banikezwa iKhisimusi enhle ngokutholakala kwezikipa zethu. Akulanto enhle, ejabulisa njengokugqoka umbala wethu,” kutsho uMhlophe.
“Ngithi kubathandi labalandeli beqembu le-Highlanders, asithengeni izikipa sitshengisele ukuthi ngempela siyalisekela iqembu.”
Isivumelwano sempahla lesi sesifake uMhlophe phambili kwabo bonke abafuna ukumncintisa isikhundla ngomnyaka ozayo.
UMhlophe, osedume ngelithi “Mr White” kunguqu usebike ukuba uzaphenduka njalo kukhetho lobukhokheli ngoba esesekhona amacebo lenhlelo zokuphakamisa iHighlanders.
Amalunga uqobo aweBosso azavotela umgcinisihlalo, unobhala lelunga lekomithi ngoNhlolanja.
Kusenjalo, ingatsha ezitshiyeneyo zabalandeli balithimu zibika ukuba zitshayela uMhlophe lezinye inkokheli ihlombe ngokubamba iqembu lindawonye ngesikhathi sobunzima.
Okuthabisa abalandeli laba yikutholakala kwezikipa. Kuminyaka edluleyo, bekusangela sitolo esithengisa impahla eqondileyo.
Inengi labalandeli belidanela ukugqoka izikipa zama “fong kong” ezithungwa zidindwe emkotweni.
Sekuphume lesimemezelo sokuba lo ozathengisa ama “fong kong” uzabotshwa.
