uMthunywa
Nkosilathi Sibanda
UKUPHAKANYISWA kwabadlali abasakhulayo eqenjini leHighlanders FC kumele kucacise inhloso yomqeqetshi uBrito Baltemar, eyokuthwala inkezo yeCastle Lager, kubika abasekeli.
Umqeqetshi lo ngokufika kwakhe kumnyaka odluleyo, waveza ukuba ulande ukuzoguqula ukwenza kuleliqembu ngakho uzakholwa ebafaneni abasakhulayo.
Ukholo lwakhe kuthalenta elisacathula, uBrito usephakamise ihlekana labadlali abakade betshudula kuqembu leBosso 90. Umqeqetshi lo wafunga wathi akaboni sizatho sokuthenga abadlali, endaweni yokuthi kukhethwe labo abavele besehlelweni kumaqembu aphansi kuHighlanders.
Wabika ngesizini edluleyo, etshela abalandeli beHighlanders ukuthi kumele bakuthokozele ukuthi wakha iqembu elizanqoba kusasa.
UBrito wathi akumelanga abalandeli basole isinqumo sakhe sokukhetha abadlali abancane.
Kubadlali abakhange ilihlo likaBrito kuloGillian Nyathi oleminyaka engu-21. Amahlolanyama aphinde asondeza uDarlington Mukuli (22) eqenjini elikhulu. Abadlali laba bebeligiqa kuBosso 90, ngaphansi komqeqetshi uMelusi “Mabaleka” Sibanda.
Darlington Munkuli
UMukuli walinda okwesikhathi eside ukuthi aphakanyiswe kuqembu elikhulu. Umdlali lo uyavuma ukuthi ukulinda kwaphosa kwamdanisa kodwa kudinga ukubekezela.
“Kuliphupho lawo wonke umuntu ukudlalela iHighlanders njalo bekuyisifiso sami ukuthi ngidlalele iqembu elikhulu kusukela ngangena kuBosso 90. Kuliqiniso ukuthi ngesinye isikhathi ngake ngadana ngemva kokudlala amasizini phose amane leBosso 90,” kutsho uMukuli.
Uthe ubonga abantu abamxwayisa ukuthi abekezele.
“Laba abantu bangitshela ukuthi akusizi ukukhutshulelwa kuqembu elikhulu ube suhlaliswa ebhentshini isikhathi eside. Bangitshela ukuthi akusizi ngalutho nxa ngingadlali. Ngasilalela iseluleko sokuthi ukubekezela kuyabhadala njalo ngicabanga ukuthi yikho okwangisizayo,” kutsho uMukuli.
Abanye abadlali abasakhulayo babika ngelifanayo ukuthi iBosso idinga ukubekezela.
Umdlali lo bekumele ayezama inhlanhla kwele-Croatia kodwa kwehlula ukuthi aphumelele ngoba encitshwe i-visa. UBrito uqhubeke ngesibindi sakhe ephakamisa uCalvin “Kung Fu Panda” Chigonero, McKinnon Mushore, Romeo Zimba loNigel Ncube abaleminyaka engu-21 yokuzalwa. Esikhundleni sikanozinti esikade sabanjwa ngu-Ariel Sibanda, sekuncintisa uRaphael Pitisi oleminyaka engamatshumi amabili.
Omunye osacathula kunkundla zaphezulu uDaniel Msendami (20), waphakanyiswa nguBrito, andubana abizwe emadlelweni aluhlaza kuqembu leJwaneng Galaxy eBotswana.
Abadlali asebekhulile kukhanya bazalidweba ibhentshi lonyaka ngokuba kulomncintiswano wendawo eqenjini.
Kungxoxo ezehlukeneyo lentatheli yephephandaba likazulu, abasekeli beqembu bathe sebeyibona inhloso kaBrito kodwa bafuna ukuthi umqeqetshi lo aqine ngesithembiso sakhe sokuthwala inkezo.
Prince Ndlovu
IBosso yacina ukuthwala inkezo yeligi ephakemeyo ngesizini ka-2006.
“Wenza kuhle umqeqetshi kodwa angakhohlwa ukuthi thina sifuna inkezo,” kutsho uRachel Moyo osekela iBosso eseCowdray Park.
Umlandeli wodumo kuHighlanders uNduduzo “Teekay” Ncube uthe ulethemba lokuthi uBrito uzaletha ukukhanya.
“Ngiyasola ngiphinde ngingasoli ngoba uBrito nguye umqeqetshi olekusasa leqembu. Ngikutsho lokhu ngoba uthanda ukudlalisa abafana abasakhulayo. Sacina ngokubona lokhu kuMadinda Ndlovu ngesikhathi iqembu libizwa ngokuthi yi-ECD.
“Nxa uBrito ephakamisa abadlali kanje, sizayithwala inkezo. Sakwenza siloMethembe Ndlovu loRahman Gumbo ngeminyaka leyana. Sikhumbule ukuthi mhla sicina ukuba yintshantshu yeligi, kwakudlala abafana abancane,” kutsho uTeekay.
