uMthunywa
Ethel Ncube loJoel Ndlovu
BAZONDE bagane unwabu abazali abalabantwana eBabambeni Primary School koBulawayo ngemva kokuba kuvele ukuba kulombalisi owephula umthetho ngokunatha phambi kwabafundi ekilasini.
Indaba le ivele lonyaka lapho abazali abancwetshwe indlebe ngabantwana ukuba umbalisi uhlala ebuya emsebenzini engokhelele uMagwebu kuthi kwezinye izikhathi anathe ekilasini phambi kwabantwana.
Umbalisi lo kubikwa uke wavakatshela emahofisini amaphephandaba lapho afike khona wazama ukuzigeza ecaleni ebuya evele ezidlele amabele, uMthunywa ukuzwile lokhu.
Ekhuluma loMthunywa omunye wabazali olomntwana ofunda eBabambeni owale ukuchaza igama lakhe ngoba esesabela umntanakhe uveze ukudana kakhulu ngesenzo sombalisi lo.
“Singeke sibhadale imali yesikolo abantwana bethu belande ukuyabona utitsha edakwa, lokho akuvumi ngitsho. Umbalisi lo uhlala edakiwe nsuku zonke, abantwana bayakhuluma njalo ubufakazi bukhona ngezigubhu zakhe zotshwala atholakala elazo.
“Omunye umntwana ongumfana wathatha izigubhu zotshwala ekilasini wathi kumbalisi lo sengisiyatshengisa umphathisikolo umbalisi lo wambhula kakhulu, ngikhuluma umntwana lo endlebeni kasezwa, wamlimaza,” kubika omunye wabazali owale ukuqanjwa ngebizo.
Uqhubekele phambili eveza ukuba indaba sebayibika kubaphathi besikolo kodwa kukhanya kayiyi ndawo.
“Sabhala incwadi yokuthi umbalisi lo akuzanywe icebo ngaye ngoba abantwana bazafeyila kodwa akulanto ecacayo eyenzakalayo. Sifuna impendulo lapha ukuthi yindaba kungelamizamo ngabantwabethu bafunde nini umbalisi ehlala edakiwe.
“Abantwana abangamankazana bazahlukunyezwa phela nanko phela kubikwa angadakwa uyababhaxabula okuzwayo abantwana. Abantwana bathi uyake athi bamhlikihle izicathulo zakhe zishayine nxa zingashayini umntwana engasuki kiso, okulandelayo kuyini khonapho,” kutsho lumzali.
Ekhuluma lentatheli omunye njalo umzali uthe kungcono abantwana bahlale bengayi esikolo.
“Abantwabethu ngikhuluma khathesi silabo ezindlini, njengabazali sibone kungcono ukuthi bangayi esikolo kuze kuthathwe inyathelo ngombalisi lo nxa kungela okwenziwayo sibone okokwenza lathi silinde ukuba kufike oLwesihlanu ngeviki elandelayo sibone ukuthi senzani ngombalisi lo.
“Abantwana abangamankazana yibo abasengozini bancane balakho ukuthi bahlukunyezwe bangakhulumi ngoba lokwethusela uyathusela abantwana bacine bengasazi ukuthi bathini,” kuveza umzali.
UMthunywa uxhumane loProvincial Education Director wakoBulawayo uNkosazana Olicah Kaira uvumile ukuthi udaba olunjalo solufikile endlebeni zakhe njalo kusachwayisiswa ngalo.
“Abazali kumele bafunde ukuthi indaba aziqedwa ngokugijimela kumaphephandaba njalo akumelanga bathathe umthetho bawufake ezandleni zabo kabeke ugatsha lwezemfundo lusebenze,” kuphetha uNkszn Kaira.
