uMthunywa
Samkelo Tshuma
INHLANGANISO ezimele yodwa esebenza ngaphansi kweWorld Vision, iSave isiphathise abafundi abaphila lobugoga ngokubakhela izambuzi ezifanele ukusetshenziswa ngabantu abalesimo lesi esikolo seChewondo Primary eMaphisa.
Ekhuluma lentatheli uMgcinisihlalo wekhomithi yabazali eChewondo Primary uNkosikazi Bazuzile Moyo uveze ukuba uhlelo lweSave luphathise isikolo lesi ngempahla yokwakha izambuzi njengendlela yokuphathisa ekugcwaliseni amalungelo abafundi abaphila lobugoga.
“Inhlanganiso le inanzelele ukuthi abafundi abaphila lobugoga bebesebenzisa izambuzi ezifana lezalabo abangela bugoga, ngakho ibone kulicebo elihle ukuthi kwakhiwe izambuzi ezifanele abafundi laba,” kutsho uNkkz Moyo.
Ulandisele uMthunywa ukuthi inhlanganiso le iphathise ngempahla yokwakha enela izambuzi ezilitshumi, kuthi ezimbili yizo ezabafundi abaphila lobugoga.
Uqhubekele phambili wathi iphurojekithi yokwakha izambuzi bayiqala ngenyanga kaMabasa njalo ikhangelelwe ukuphela ngenyanga kaLwezi.
UMthunywa uthintane lesinye isakhamuzi esilomntwana ophila lobugoga esiziveze ngokuthi nguNkosikazi Ntombikayise Ncube, uchaze ukuba kuyamjabulisa ukuthi abantwana abaphila lobugoga sebenakekelwa esikolo lesi njalo uveze ukuthi lokhu kulinyathelo elihle ngoba kutsho abantwabethu kabasekho engozini yokuhlaselwa yimikhuhlane.
“Kuyangijabulisa ukuthi abantwana abaphila lobugoga bananzwe ngalindlela. Abanye babo bebehlala besengozini yokuthola imikhuhlane,” kutsho uNkkz Ncube.