uMthunywa
YiNtatheli kaMthunywa
SOKUKOMPUNZI idla emini elokitshini leMagwegwe West nanko phela intsha yakule indawo isikokotsha ebusuku lemini kuma-vuzu party njengoba inengi labo lihlala lodwa.
Kuzwakale ukuthi kundlu elekheli ethi 5055 yikho lapho intsha yakulelilokitshi kanye lakwamanye ezenzela khona umathanda ubusuku lemini njengoba ama-vuzu party la esefana xathu lokudla kwansukuzonke.
Kubikwa okucunula abadala bakulelilokitshi yikuthi abatsha laba bangadakwa kabahloniphi ngitsho bacina betshaya abantu abadala.
UMthunywa uvakatshele kulelilokitshi wakhulumisana loNkosazana Siphokuhle Ncube ochaze ukuthi akusalalwa kulelilokitshi ngenxa yentsha le.
“Sesithwele nzima ngabantwana balapha ngoba balala bebanga umsindo ubusuku bonke. Nxa sibakhuza basitshela ukuthi ngeke sibatshele lutho ngoba singasi bazali babo.
“Isimanga yikuthi singaze sibikele amapholisa kawenzi lutho sesiphila ngokwesaba ngoba abantwana laba bayasitshaya singahamba ebusuku,” kutsho uNkszn Ncube.
Esinye njalo isakhamuzi sakulelilokitshi uNkosazana Simiso Ndlovu sichaze ukuthi abantwana laba sabathola bebhema amaphilisi yikho besenza izigigaba ezesabekayo.
“Abantwana laba bachola amaphilisi afana lama-panado bawahlanganise lamaphilisi eBP kanye lama-Anti retroviral drugs (ARVs) lokunye okuthize besebezibhemela okucatshangelwa ukuthi kucina kusenza isidakamizwa esibizwa kuthiwa yiwhoonga.
“Mina ngikhuluma nje ngilodadewethu owababona ngamehlo akhe bekwenza lokhu,” kuchaza uNkszn Ndlovu.
Esinye isakhamuzi sakulelilokitshi esilabantwana abahlala bodwa uNkosazana Alice Sithole esithintwe nguMthunywa ecingweni sivumile ukuthi sesizwile ngokungaziphathi kwabantwabaso.
“Lami sengikuzwile ukuthi abantwabami abasaziphathanga okwamanje ngithumele umnawami ohlala khonale eMagwegwe ukuthi ayebakhuza njengoba mina ngisebenzela eSouth Africa. Usizi yikuthi ngabantwana abangamankazana ngakho ngizacela lezakhamizi ezingomakhelwane ukuthi zibakhuze,” kutsho uNkszn Sithole.
Ekhuluma loMthunywa uRetired Warrant Officer Titus Mxotshwa onguResidential Chairman elokitshini leMagwegwe West abuye njalo abengumfundisi kubandla leZion uchaze ukuthi inengi labantwana laba lincane kakhulu njalo selisenza izinto ezethusayo.
“Inengi labantwana laba lincane kakhulu ngoba abanye babo baleminyaka engu-16 kusiya phansi. Okusuka kudanise izakhamizi yikuthi abantwana laba abasanathi tshwala sebebhema imbanje kanye lezinye izidakamizwa bathi bangakwenza lokhu sebetshaya abadala. Ngikhuluma nje esinye isakhamuzi salapha esaziwa ngokuthi nguMabhimba saphosa salimala sijikijelwa yizigebengu lezi ngamatshe.
“Okunye njalo izigebengu lezi sezasungula iqembu elilabafana abedlula i40 zalithi yi-Terror Gang okuyilo elibamba abantu inkunzi. Ngikhuluma nje omunye walezizigangi wayephakathi kwezigangi zeLuveve ezasezihluphile.
“Ungaze ubahambise emapholiseni abantwana laba kabenziwa lutho lathi sesize sikhathele ngabo njalo sesiphelelwe ukuthi singenzani,” kutsho uMnu Mxotshwa.
UMnumzana Edwin Khumalo ongesinye isakhamuzi sakule indawo uchaze ukuthi abafana laba bengaze bagange njani kababotshwa ngamapholisa.
“Mina okusuka kungethuse yikuthi abafana laba kabazake babotshwe, ngikhuluma nje kulomfana othiwa nguNhlanhla owatshaya udadewabo wavuvuka ilihlo amapholisa amekela angamenzi lutho,” kuveza uMnu Khumalo. Ukhansila wakule indawo uMnumzana Clayton Zama ubikele intatheli ukuthi indaba le uyayazi kodwa baswele ukuthi bangenzani njengezakhamizi.
“Indaba yobugangi babantwana siyayazi ngakho sihlala sizama ukubakhuza kodwa kabakhuzeki ngoba ungabakhuza bayakubophisa bethi uyabahlukuluza. Ngalokhu-ke besicela amapholisa asincedise ekukhuzeni abantwana ngoba sebehluphile,” kuchaza uKhansila Zama.
Isikhulumi samapholisa koBulawayo uInspector Precious Simango ebuzwa ngale indaba uthe abazali kufanele bancedisane lamapholisa ekukhuzeni abantwana.
“Indaba le ibingakafiki kithi kodwa esikukhuthazayo yikuthi abazali kabancedisane lamapholisa ukuze benelise ukukhuza abantwana.
“Akufanelanga ukuthi abazali bathi sebehlulwe ngabantwababo, kungcono ukuthi nxa bekwehlula ubase emapholiseni ukuze bame ubugangi lobu,” kuphetha uInsp Simango.
