uMthunywa
Nkosilathi Sibanda
BALELE bengalele ngenjabulo abalandeli beqembu leSenegal eselifike ku-Last 16 yenkezo yoMhlaba ngokutshaya i-Ecuador nge 2-1 ngoLwesibili ntambama.
Umdlalo ubukelwe linengi elisekela amazwe e-Africa akumkhankaso womqhudelwano wamazwe lo, oqhutshelwa ezweni leQatar. Usekelo lolu lubonakele lakoBulawayo, ikakhulu kundawo zokuzilibazisa ezisenzikini yedolobho.
Bekugcwele enkundleni yeKhalifa International Stadium, kugcwele njalo lasemabhawa kundawo ezinengi eAfrica.
Ukunqoba kweSenegal kuvuselele ukuzethemba kubadlali bama-Lions of Teranga ngesikhathi kucatshangelwa ukuba ngeke benelise ngoba uSadio Mane akekho kuWorld Cup.
Ama-Lions of Teranga yibo intshantshu zenguqu ye-Africa. Iqembu leli lacina ukufika kusibanga se-Last 16 kuWorld Cup ka 2002.
Kulumdlalo, abadlali batshengise ukuthi iSenegal ilalo elinye ithalenta elizayiphakamisa, badlalele ukuqinisekisa inhloso yayo yokudlulela phambili.
Ukaputeni uKalidou Koulibaly usukumise abantu ethulula ibhola lesibili alihlohle ngomzuzu wesi-70, kwaba yilo ibhola elivale umdlalo. U-Ismaila Sarr nguye ovule igedi esigabeni sokuqala ngomzuzu wesi-44.
I-Ecuador idlalise amathuba yajeziswa. Yona ihlohlelwe nguMoises Caicedo.
Komunye umdlalo ka-Group A odlalwe izolo, iNetherlands yedlulele phambili kuLast 16 ngokunqoba iQatar nge 2-0. INgilandi inqobe iWales 3-0, I-Iran itshaywe yiMelika nge-10.
Kusenjalo, iyaqhubeka imidlalo lamuhla:
*Denmark v Australia, Tunisia v France, Poland v Argentina, Saudi Arabia v Mexico.
