uMthunywa
YiNtatheli kaMthunywa
UMDLALO we-basketball kuleli utshengisa ukuba lekusasa enhle ngokuqhutshwa kwemincintiswano etshiyeneyo esifake abadlali ezingeni eliphezulu.
Kusukela kuminyaka emine edluleyo umdlalo lo ubuthola usekelo lokuqhuba imincintiswano, okube lithuba elihle kubadlali labaqeqetshi ukuthi baphakamise ulwazi lwabo kulumdlalo.
Ekuqaleni komnyaka iqembu lomdlalo we-basketball lakuleli lancintisa kwele-Botswana kumqhudelwano wohlelo lwe “3 on 3” oludibanisa amazwe ayisitshiya galolunye kumncintiswano obizwa ngokuthi yi-Young Lions Cup Championships.
Umkhokheli wenhlanganiso yeBasketball Union of Zimbabwe (BUZ) uJoe Mujuru uthe kusehlelweni lwabo ukuthi baqoqe imincintiswano eminengi ukuze bathuthukise umdlalo.
“Umdlalo wethu utshengise ukuthi usuthuthuka kuzigaba ezinengi zelizwe. Kuminyaka edluleyo sinanzelele ukuba inkezo zokuncintisa esibelazo yizo ezilethe ukukhuthala kumaqembu ethu.
“Kusizini ezayo sizakhuthaza ukuthi ingatsha zethu zilungiselele ukuphatheka kumincintiswano,” kutsho uMujuru.
Umgcinisihlalo lo uthe uthanda ukubonga usekelo abaluthola koBulawayo ngesikhathi ilizwe liqoqa imidlalo yama-Zone 6 eyayingaphansi kwenhlanganiso yeFederation of International Basketball Associations ebisenkundleni yeTrade Fair lapho okwanqoba khona iqembu leAngola iPremiera Augosto.
Ukuqhutshwa kwemidlalo le kweza ngesikhathi inhlanganiso yeBulawayo Basketball Association ikhalaza ngokuswela imali yokusekela imidlalo yayo.
Ekuqaleni komnyaka odluleyo inkokheli zalumdlalo koBulawayo zabika ukuba zizahlanganisa iligi yazo lamanye amadolobho aseduzane ukuze kubelula ukusondeza amankampani angakhwabitha ukusekela.
