uMthunywa
Langelihle Moyo
BABETHABE bemanzi nte abeqembu leZimnyama Dance Ensemble mhla bethakazelela iminyaka elitshumi lanhlanu yempumelelo yeqembu labo kwezomgido wesintu.
Umcimbi lo owenzelwa e-Nyathi Youth Centre eMpopoma edolobheni lakoBulawayo ubuthanise amaqembu amanengi abejabulisa uzulu ngokudla kwamehlo lendlebe. Amaqembu la agoqela i-Asante Mo, i-Iyasa, labanye abahlabeleli abagoqela uThandi Dlana, uMandie Mae loZhezhingtons umfana wesiJahundeni. Amaqembu la wonke ebehamba ngenjongo yinye ukuzoxhasa iqembu leli lithakazelela iminyaka yalo engu-15 lokujabulisa uzulu.
UWitness Tavarwisa ulandise imbali yeqembu leli lakho konke okuyimpumelelo asebedlule kikho.
“Ibizo lequmbu leli lathatha kweZimnyama intaba ezinde ezitholakala ePlumtree, njalo iqembu leli labunjwa ngomnyaka ka 2009 nguPhibion Ncube. Lidume ngomculo lomgido wesintu.
“Iqembu leli selihambe libukisa isipho salo endaweni ezitshiyeneyo ezigoqela ama-festival athi Intwasa Festival, Ibumba Arts Festival, Du Sud Festival njalo sebeke bavakatshela kwamanye amazwe besenza lokho abadume ngakho, amazwe la agoqela Botswana tour ngo2019, France, Spain, Switzerland 2022/23. Besokusithi ekubeni zintshantshu angikhulumi sokuyikudla kwabo. Babazintshantshu ngomnyaka ka 2014 kumncintiswano wezomgido (Best Contemporary Dance) kwathi ngomnyaka ka 2017 bathola isicoco kwabe National Aids Council Of Zimbabwe, baphinda bathola isicoco sokuba zintshantshu kwezomgido kuma BAA ( Bulawayo Arts Awards). Babazintshantshu njalo kumncintiswano weChibuku NeShamwari.
“Angeke sibalise konke ngoba kunengi kakhulu osekwenziwe liqembu leli okuhle kodwa okulethwa yikusebenza kwabo langokuzimisela,” kulandisa uMnu Tavarwisa
Besajabulile ukuthi sebefikise iminyaka engu-15, uThulani Javas Sibanda, owenhlanganiso okuthiwa yi-Exclusive Performers Management, wethule indaba ezimnandi kuqembu leli.
“Thina njenge Exclusive Performers Management sizaxhasa iqembu leli ngakho konke yithi esizaphatha indleko zabo besiyabukisa ku-Edinburgh Festival Fringe, eScotland okwamalanga angu-31 kusukela mhlaka 31 Ntulikazi kusiya mhlaka 25 Ncwabakazi.
LiFestival yi-Festival enkulu yomhlaba. Ngizizwa ngilokuthaba okukhulu ukuthi senelisile ukwenza iZimnyama ibe yingxenye yomkhosi omkhulu kangaka,” kuphetha uJavas.