uMthunywa
Indikimba – Ezothando
Imbongi nguSibangilizwe P Jubane
Isihloko senkondlo – Izenzo zothando Thandiwe
Siqhubeka ngenkondlo yethu le esiyiqale kuviki ephelileyo lapha okaJubane etshela isithandwa sakhe uThandiwe ngezenzo zothando. Siyizwile imbongi le isithi ifisa olukhulu uthando, ithandwe ngayo yonke inhliziyo langazo zonke izenzo zothando. Siphethe lapho imbongi itshela uThandiwe ukuthi ziyahamba izinsuku, iminyaka layo iyanda.
Imbongi ithi kusenzakala konke lokhu siyaguquka isimilo sikaThandiwe, kanti leyayo impilo iyaphenduka.
Luyamemetheka uthando lwayo imthandisisa uThandiwe. Izinqumo zabo ziyelekana kanti izithembiso zabo ziyelekana. Okukhona yikuthi ithi iyamthandisisa uThandiwe imbongi. Lamhlanje siyiqala lapho imbongi iveza ukuthi seyafunda amanga. Ukugqekeza lokweba sekuyimpilo yayo. Hlezi yenza lokhu nje izama ukutshengisa uthando oluphezulu kuThandiwe wayo.
Ngokugqekeza lokweba isisentolongweni imbongi. Ikuveza sobala lokhu ngala amazwi: “Entolongweni ngisebenza nzima sekuyilo khaya.” UThandiwe labantwana basele ekhaya. Usenjengomfelokazi uThandiwe kambe umyeni wakhe esevalelwe entolongweni. OkukaThandiwe sekuyikukhala kuphela. “Samfelokazi zithonta phansi izinyembezi.” Usedubeka santandane engananzwa muntu uThandiwe ngenxa yamafindo othando abawabophayo lomyeni wakhe.
Angazake asuke atshiye umendo uThandiwe ngenxa yamafindo othando abawabophayo aze afakazwa langumfundisi enkonzweni. Imbongi ithi lumunyu olwabo uthando alunambitheki ngoba lwadonswa zingilosi angezake luphonguqanyulwa nje mahlayana. Imbongi ize ithi ngaloluhlobo lomtshado ukuthi aluba babesazi babezanikela emthethwandaba bahlanganiswe khona okokuthi aluba lamhlanje ngabathethe izindaba baqume lawo mafindo bafunde izindaba zilotshwe kumaphephandaba.
Umtshado ohlanganiswe emthethwandaba kuyenzeka ukuthi nxa ususephulwa usehlukaniswe kuphindwe kulotshwe kumaphephandaba kwaziswe uzulu ukuthi usuqunyiwe njalo lowo mtshado. Kodwa imbongi ithi sekulukhuni kowabo umtshado ukuthi bobabili loThandiwe bameme uMthwakazi kaNdaba njalo bamxoxele ngale indaba yabo.
Nxa kufika kulezi zibanga imbongi iyaphinda ekukhulume ngaphambili ukuthi ifisa olukhulu uthando imthande ngalo lonke kakhulu uThandiwe.
Iyaqhubeka imbongi ithi ebunzimeni bempilo yomhlaba loba emaweni bekhilikithela kayiboni mlandu. Amajele adilikile ngalowo mnyaka kodwa uphelile umlandu wona owalandwa yikufuqwa luthando lwakhe uThandiwe. Nxa iphenduka ivela entolongweni imbongi ikhangela umuzi wayo ibona nganxanye lunxiwa. Kambe kuyamangalisa yini lokhu wona umuzi ubungasela baba umniniwo? Isithandwa sayo uThandiwe uthandele amaqhele esiwa.
Indlala ingenile lapha ekhaya ngoba izingane labomangoye kuhamba kusiwa. Nxa ikhangela imbongi ebaleni lomuzi ibona inkukhu zisilwa. Yona imbongi ivela entolongweni ifika ime ibukele uthando lusiwa loThandiwe lona balupha kusinwa (kugidwa) kudliwa lenyama enengi. Lokhu ikufakaza ngala amazwi imbongi: “Mhla inkab’enkulu kwethu, isiwa.” Imbongi sibuye isifunde eminye imisebenzi eyayingayenzi kuqala ingakayi entolongweni.
Imbongi ithi kudala yayibaza izigodo ingakwazi ukubaza izitulo kodwa lamhlanje ibaza lezivalo. Ibethela lophahla lwesimanje ingelavalo ivimba ubuyanga ngengalo ngoba isisebenza imali ingelavalo. Isifundele imisebenzi yezandla yokuziphilisa entolongweni.
