uMthunywa
Imbongi nguArtwell Masuku
Isihloko senkondlo – Thethelela
Inkondlo le ingumthandazo owenziwa yimbongi. Imbongi ithandaza kuMdali wayo, uNkulunkulu, uMvelinqangi ukuthi kabathethelele ezonweni zabo. Ngenxa yokukhonza kwabo uNkulunkulu kunengi okungabahambeli kuhle empilweni zabo. Imbongi iqala inkondlo yayo ngokuthi yona labanye abanengi bafakwe icala bengalazi.
Lokhu kutsho ukuthi imbongi labanye kuthiwa balecala thile kodwa bona bengalazi. Ngokholo lwabo imbongi ithi bathukiwe. Ngamanye amazwi imbongi ithi bathethisiwe njalo badelelwe. Lanxa kunjalo imbongi ikubeka sobala ukuthi kodwa abawalahlanga amazwi oMdali wabo. Bahlezi lapha emhlabeni balindele umbuso kaNkulunkulu wabo.
Iyagcizelela isihloko senkondlo ithi kakube njalo uMdali wabo abathethele okuyikuthi kabaxolele ekoneni kwabo. Izikhulumela yona yodwa ngokwayo imbongi ithi imamukele uNkulunkulu wayo ngodumo olukhulu. Ngaye uNkulunkulu wayo yafakwa icala, ngaye yathukwa njalo ngaye uMdali wayo yadelelwa. Lokhu kuveza sobala ukuthi ngoNkulunkulu wayo ivelelwa yiziga ezinengi.
Imbongi yona izinikela ngoba ithi ngalezompazamiso yona yamdumisa kuphela uNkulunkulu wayo.
Lanxa ibubula, ikhala ithi izamdumisa kuphela uNkulunkulu wayo. Iyaqhubeka imbongi ithi ikhala,
“Ngikhihl’isilil’ngakudumisa/Ngithi mayenziwe intando yakho/Uze usithethelele. Lapha kuvela sobala ukuzinikela kwembongi ekudumiseni uNkulunkulu wayo ngoba ithi lanxa iphakathi kokukhala kodwa kayekeli ukudumisa uMdali wayo ithi mayenziwe intando yakhe njalo keze azobathethelela izono zabo.
Lanxa iphakathi kwezilingo lenhlupheko zemhlabeni imbongi ikubeka sobala ukuthi izohlala imdumisa uNkulunkulu wayo. Lokhu kufakazwa yila amazwi: “Lapho ngihlezi ezweni/ Ngimpofu ngokuzalwa/Umuzi lezwe ngingelakho okwami/Ngihlalel’ukuhlupheka/Labafowethu baphetsheya bengenz’isigqili sabo/Izithukuthuku zami ziphelel’eboyeni/Ngohlala ngikudumisa/Ngith’ ubathethelele ngoba abaz’abakwenzayo.”
Esikuzwa kula amazwi yikuthi imbongi ithi kayilandaba lesimo ekuso kulo umhlaba kungaba yibuyanga ngokuzalwa, ingulowo ongelalutho okwenotho yalapha emhlabeni ngoba umuzi lezwe ingelakho, ihlalele ukuhlupheka kuthi lalabo abemzini abeza bafika bathumba ilizwe lakwabo babenza izigqili babasebenzisa kayaze yathola lutho imbongi kwaba ngezenja izithukuthuku zona eziphelela eboyeni imbongi yona izinikele itshela uNkulunkulu wayo ukuthi izohlala imdumisa njalonjalo.
Kayibabambeli isikhwili labo abayihlukuluzayo kodwa yona ithi: “Ngith’ubathethelele ngoba abaz’abakwenzayo”. Le yinkulumo yamakholwa evela kugwalo olungcwele ibhayibhili okwathi leNkosi uJesu ihlutshwa kakhulu kusiya ekubethelweni esiphambenweni saseCalvary yakhuluma lawo mazwi ithi izitha zayo kazixolelwe zithethelelwe ngoba zingazi ezikwenzayo.
