uMthunywa
ENGABE esethole ukukhululeka uMarvelous Nakamba ngemva kokungena kuqembu leLuton Town kodwa usebiza imali encane.
Umdlali lo, usuke kuClub Brugge elentengo ephezulu kwamadola eMelika ayi-14 miliyoni, wehla waya ku-6 miliyoni ngesikhathi esebolekwa kuqembu lakhe elitsha kuleliviki.
Ngemva kokuhlala ebhentshini kuqembu leAston Villa okwesikhathi eside, uNakamba useze wabeka iphuka kuqembu leLuton Town.
Kukhangelelwe ukuthi athole ukudlala kuleliqembu mihla yonke loba nje kucaca ukuthi usuphelile umphako kuye.
Umdlali lo, ubesegudwini kunsukwana ezizanda kwedlula ngesikhathi abalandeli be-Aston Villa besithi kasuswe eqenjini ngoba kalancedo kubo.
UNakamba ubelilunga leqembu leli okwamasizini amathathu kodwa kuthe kusuka umqeqetshi uSteven Gerrad, kwabalenguquko eqenjini, kwacaca ukuthi kaselandawo yokudlala. Ukufika komqeqetshi u-Unai Emery, uNakamba ubengasela ndawo, esephikelela ngokukhuhla ibhentshi. Lumqeqetshi wamtshela ngokuphangisa ukuthi kakho kuzinhlelo zakhe.
NgoLwesibili iLuton Town ibike ukuba iyathokoza ekuthini uNakamba usengumdlali wayo.
uMarvelous Nakamba
“Siyajabula ukumemezela ukubolekwa komdlali wasesiswini we-Aston Villa uMarvellous Nakamba kuze kuphele isizini yalonyaka,” kutsho umbiko ovele eqenjini leli.
Ebuzwa ngokufika kwakhe ku-Luton Town, uNakamba utshele intatheli zeNgilandi ukuthi ujabulile.
Kunkulumo yakhe, kubemgceke ukuthi uyathokoza ngokutshintsha iqembu, okuyikhona okulakho ukuthi kumkhukhumeze athole ukuzethemba futhi.
Umdlali lo kuzwakale ukuba uphumelele ekuhlolweni ngodokotela ababike ukuba ngempela ulungele ukuthi adlale.
“Ngijabule kakhulu ngokuba lapha eLuton Town. Ngingena kuleli qembu ngisazi u-Henri Lansbury owe-Aston Villa lo-Ethan Horvath ngoba ngidlale labo e-Club Brugge, ngakho ke kuyangijabulisa ukuphinda ngibabone,” kutsho lumdlali.
“Ngikhulume lomqeqetshi wangitshela ngohlelo lweqembu ngamtshela isimo sami, ukuthi kuyangijabulisa ukuza lapha.
“Ngicabanga ukuthi kuhle la esengikhona, kuhle kimi futhi ngiyasithanda isifiso seqembu leli. Ngikhangele ngabomvu ukufaka isandla ukuze ngisize iqembu.”
