uMthunywa
Ethel Ncube
KULENDODA yeNana eNtabazinduna engenele amantombazana ayisithupha exhibeni lawo ifuna ukuwabamba iganyavu iphethe ihloka uMthunywa ukuzwile lokhu.
UClement Moyo oleminyaka yokuzalwa engu-27 kubikwa ugqekeze emzini wakoGabela kumaviki asanda kwedlula wafika wabamba iganyavu omunye walaba owayelele.
Kuzwakale ukuthi uMoyo wafika wafuqa isivalo esasisekelwe ngensimbi emuva wenelisa ukungena phakathi kungekho omzwayo.
UNomthandazo Gabela ongunina wamantombazana la ulandisele uMthunywa ngendaba le.
“Kwakuphakathi kwamabili uMoyo aze asingenele endlini. Mina ngangilele kwenye indlu abantwabami labazukulu bekwenye. Okusidida kakhulu yikuthi kasizange simuzwe ngitsho engena lanxa endlini kwakuletanka yegasi enkulu eyayisekele isivalo.
“Ubhinya wathi esengenile endlini waqonda lapho okwakulele khona amantombazana wafika waphakamisa umntwana owayelele eceleni kukanina wambeka eceleni andubana ahlubule unina impahla ambambe iganyavu,” kulandisa uNkszn Gabela.
Uqhubekele phambili esithi kukhanya uMoyo esenza konke lokhu indodakazi yakhe yayingamuzwa yayisizwa sengathi iyaphupha.
“Angazi sibili ukuthi umfana lo wayesebenzisani kodwa kukhanya ulomuthi sibili. Kambe umntwana angakhutshwa impahla zangaphansi abanjwe iganyavu esexhibeni eligcwele abanye bonke bangamuzwa. Kukhona okutshaya amanzi lapha,” kuchaza uNkszn Gabela.
Uthe indodakazi yakhe yathi siphapheme yahlaba umkhosi okwenza bonke bavuka.
“Sezwa untombazana wami esehlaba umkhosi esithi kulomuntu sonke seqa. Umfana lo wenelisa ukudobha ihloka lakhe wazama ukubaleka kodwa omunye untombazana wenelisa ukubamba ihloka mina ngasengimtshaya ngesigodo,” kuveza inina leli.
Umamangala kulelicala uthe kwaba yisimanga kuye ukuthi athi ephaphama athole umuntu eceleni kwakhe.
“Ngangingathi ngiyaphupha umuntu enginwayizela kodwa ngokuya kwesikhathi ngacina ngiphaphama ngethuka ngibona umuntu eceleni kwami esengihlubule lempahla. Ngethuka ngahlaba umkhosi abantu bonke bavuka bamgijimisa,” kulandisa umamangala.
Imizamo yokukhulumisana lesikhulumi samapholisa esabelweni seMatabeleland North yehlule.
