uMthunywa
Nomthandazo Ndlovu
UTHANGO solusidla amakhomane esikolo seNhwali Secondary eGwanda nanko phela kubikwa kulombalisi osetshonela ukuya emacansini labantwana abangamantombazana esambuzi sesikolo.
Ekhuluma loMthunywa uMnumzana Gideon Mhlanga oyisakhamuzi sakule indawo uthe abantu bonke esigabeni lesi abasamfuni umbalisi uMnumzana Mbuso Ndlovu owaziwa ngokuthi nguGatsheni ongumbalisi walesi sikolo ngoba seqede abantwana njalo sokuze kucatshangelwa ukuthi kungaba nguye osebangele abafundi ukuthi batshiye isikolo sebezithwele.
“Abadala abasamfuni uGatsheni, badla amahabula lapha kambe sihambisa abantwana ukuthi bayefunda yena ufika ebenze abafazi kuyini lokho?” kutsho uMnu Mhlanga.
“Abantwana abanengi abaqedi lesikolo khonapha sebezithwele sicina singasazi kumbe nguye ngoba abanye babo besaba lokukhuluma abanikazi bezisu lezo,” kuchaza uMnu Mhlanga.
UMthunywa uzwe ukuthi umbalisi lo uzidlela abafundi laba esambuzini sesikolo ngemva kokubathembisa ukuthi uzabancedisa baphumelele ezifundweni zabo. Omunye njalo umbalisi owaziwa ngokuthi ngu G Dube ofundisa esikolo lesi kubikwa wake wanankwa ngumntwana wesikolo kubangwa intombi.
Esinye isakhamuzi esithe singu Puso Tlou esilomntwana ofunda esikolo lesi sithe sesiphelelwe ngamaqhinga okuthi senzenjani ngomntanaso ngoba umntwana uthwele amagabha avuzayo ngombalisi lo ozibika kusa kwamalanga.
“Mina angisakwazi ukuthi ngenzeni ngomntanami ngoba uthi uGatsheni umthwalise nzima uhlala ezibika kuye kusa nsuku zonke, angazi kumbe ngimsuse esikolo lesi yini,” kutsho uNkszn Tlou
“Indaba le ayingiphathi ngitsho lakancane ngoba umntanami angazithwala kumbe agule yimi engizadubeka yena umbalisi lo kalahlekelwa yilutho,” kuchaza uNkszn Tlou.
Ebuzwa ngodaba lolu umbalisi uGatsheni uphike wemba phansi wathi yena akuladaba olunjalo.
“Hatshi dadewethu mina angikwazi lutho ngendaba le okhuluma ngayo, ngcono ubuye uzokhuluma lomphathisikolo mhlawumbe yena angakusiza,” kuphetha uGatsheni.
Imizamo yokukhulumisana lomqondisi wezemfundo esabelweni seMatabeleland South yehlule ngoba kuthiwe kakho usemhlanganweni eHarare.
