uMthunywa
BAHAMBA ngobusuku njalo bacathamela abantu bephakathi kwesambuzi eTembisa indawo eseEkurhuleni kweleSouth Africa. Obanjiweyo uhudulelwa phakathi kwesambusi bamthathele imali kuthi nxa engelayo bamdlise ingcekeza yabantu.
Izigelekeqe lezi kaziselandaba lomnuko osemathoyilethi lo, kukhanya ngeke uzehlukanise lothando lokudla imali ezingayisebenzelanga.
Kubikwa izakhamizi azisahlalisekanga ngoba lingavela litshone ilanga odlule kulezi zambuzi uyeqelwa ahudulelwe phakathi, okwenzakala ngemva kwalokhu yindaba ebuhlungu kakhulu, abantu badliswa ingcekeza yabantu uma bengelayo imali yokunika izigebenga lezi.
Nxa usuphakathi kubikwa bayathi ubaphe umakhalekhukhwini wakho lemali kuthi nxa ungala bacuphe ingcekeza bakugcobe ebusweni kuthi enye bakudlise yona.
Inengi labantu lihle libanike abakufunayo kulokudliswa ingcekeza eyenyanyekayo. UMnu Boas Ndlovu oyisakhamuzi uthe ngelinye ilanga wayevela ebhawa eselubhekise ngekhaya wahlangana lazo izigilamkhuba lezo zimlindile.
“Bathi ngibanike imali kumbe nxa kuyikuthi kangilayo kuzamele ngidle ingcekeza ethoyilethi. Ngathi ngibatshela ukuthi imali ngiyiqedele ebhawa oyedwa wakhipha umhedla wawungenisa phakathi kwetshemba wacupha ngawo ingcekeza. Wangi ngingekela ukubanika imali uzangidlisa yona aphinde angigcobe ngayo umzimba woke.
“Ngasengiphakathi kwetshe lembokodo impela, kungakho-ke ngakhipha i-100 randi engangiyifihle phakathi kwesokisi lami ngabaqhubela basebengikhulula ngahamba ngigijima samuntu obone isipoko,” kutsho uMnu Ndlovu.
Omunye laye owahlanganaazo izigangi lezi uMnumzana Klaas legodi wathi wayesendleleni yokuya vakatshela abanye abahlala maqondana lemikhukhu yabo ngesikhathi ehlangana labo.
“Angandisanga ukuthwala umakhalekhukhwini wami nxa ngihamba ebusuku. Bathe bengeqela, ngangingela mali kumbe umakhalekhukhwini.
“Ngenxa yalokhu, bangithathela amatheki ami awePuma ngacina ngihamba ngenyawo.
“Ngathi ngifika emzini womngane wami, wafa ngokuhleka emangaliswa yikuthi ngibhada phansi ngonyawo kodwa ngathi sengimtshelile ukuthi kwenzakaleni wethuka.”
UKaputeni Manyadza Ralidziva oyisikhulumi samapholisa uxwayise bonke asebeke bahlaselwa yizigelekeqe lezi ukuthi bazimangalele emapholiseni.
“Thina ngeke sicubungule ngalindaba uma kungekho oke wazamangala.” — Ubulembu
